MZP-in College admission fee refund theih ve nana hmala turin higher & technical education minister ngen

Aizawl | June 28, 2021: Vawiin June ni 28, 2021 (Thawhṭanni) tlai dar 3:00 khan MZP hruaitute chuan Higher & Technical Education Minister Dr. R. Lalthangliana chu a Pisa-ah hmuin UGC thuchhuak University Grants Commission Notification on Refund of fees and Non-Retention of Original Certificates, October, 2018 a tih chhuahin a tarlan anga zirlai college-a Admission ti tawh ten eng emaw rokhawlhna avanga an zirlai an chhunzawm theih loh emaw zirna hmun an thlak duh chuan Notification zulzuiin, hun tiam chhungin Admission fee an pek tawh chu college-in an lo pe let leh (Refund) tur a ni, tia tarlan chu Mizoram college hrang hrangah hman ve a nih theih nan hma la turin a ngen.


Minister chuan MZP hruaitute ngenna chu ṭha taka lo dawng sawngin hemi chungchangah hian Higher & Technical Education Commissioner hovin Mizoram Principals' Council ten meeting an neih tur thu leh a ṭul anga bawhzui a nih tur thu a lo sawi.


MZP chuan hrileng avanga harsatna nasa tak kan tawh mek laiin zirna chungchanga zirlaite harsatna tawh te ngun takin a vil reng a. Zirlaite Admission chungchangah te, School fee chungchangah te a ṭul angin MZP chuan hma a la chhunzawm zel a. Hemi chungchanga zirlaite harsatna hriaa School Education Minister hmalakna leh School Education Department leh Mizoram Board of School Education thawktute inpekna  leh zirtirtute thawhrimna chu chhuanawm a ti hle bawk.


MZP-in sorkar enkawl High School/ Higher Secondary school-ah zirlaiten admission chungchanga harsatna an tawh loh nan hmala turin Education Minister hnena a thlen chu an thlen anga hmalak nghal a ni leh, hemi chungchanga sorkarin thuchhuah (Memo No. B. 11015/3/2020-DSE(Estt)) a siam nghal chu MZP chuan lawmawm a ti hle a. Tin, hrileng avanga class pangngai kal theih a nih loh laia zirlaite tana tha leh zung nasa taka senga online class kaltlanga zirtirna ṭha tak petu zirtrtute thawhrimna chu MZP chuan lawmawm a ti takzet a ni. Chutihlaiin, mimal enkawl zirna in ṭhenkhat sorkar thuchhuak bawhchhiaa school fee 70% aia sang la luite chunga khauh taka sorkarin hma a la chu MZP chuan lawmawm a ti hle a, hmala chhunzawm zel turin a ngen nghal bawk.

Post a Comment

0 Comments