MSU Smart Phone for BPL/AAY Family Students kalpui

Aizawl | June 30, 2021: Mizo Students’ Union (MSU) General Headquarters, Aizawl chuan covid-19 hri leng avanga zirlaite’n online class an kal ṭhin tak avanga “MSU Smart Phone for BPL/AAY Family Students” project hmanga zirlai harsate tan mobile handset a ngaihtuahsakna kal zelah vawiin chawhnu dar 1:00 pm khan Smart phone handset 33 dawnna hun a hmang.


He hun hi MSU general secretary Samuel Zoramthanpuia chuan a kaihruai a, zirlaite tana thil pek petu Pu John Lalpeka, Proprietor; 3:16 Plan Solution chuan thu sawiin “Hri leng hian Mizo khawtlangah chhungkaw khawsak a inrual lo hle tih a tilang chiang a, ṭhenkhatin dam khawchhuah nan an thawk ṭawk ṭawk a, an fate lehkha zirna atana pawimawh ber lo ni ta mobile handset pawh an lei hleithei lo. Chutih laiin chhungkaw ṭhenkhata zirlaite chuan Computer, Laptop leh mobile handset changkang ber ber nen lehkha an zir thei thung a, test leh exam-ah pawh pass an harsat lo vang. Hei hian nasa takin zirna quality leh zirlai personality a sàwi danglam dawn a, zirlai smart phone nei lo chu a fail dawn tihna a ni bawk. Chuvangin, zirna kawnga zirlaite intluktlan nan leh zirlaite chawikan nan he thil hi ti ka ni.” a ti a. Pu John-a chuan sawrkar hotute pawhin zirna kan kalpui mekah zirlaite harsatna tawh lian tak hi hre renga ruahmanna siam a nih vat a beisei thu leh chhungkaw tin pawhin kan fate zirna kawngah rilru kan pek lehzual a ngai hle tih a sawi bawk a ni. 


MSU president Pu J. Lalmuanzuala chuan “MSU Smart Phone for BPL/AAY Family Students” thil tum sawi fiahin mobile handset chu a dawng tur zirlai dik takin a dawn theih nan institution leh khawtlang hruaitu hriatpuina tel lo chuan pek chhuah a ni dawn lo a ti a. Mi inphalte avanga zirlai harsate’n zirna an chhunzawm thei tur chu lawmawm a tiin thilpek petu Pu Johna chungah lawm thu sawiin mi inphal dangte pawh zirlaite tan an rawn pen chhuah zel a beisei thu a sawi nghal bawk a ni.


“MSU Smart Phone for BPL/AAY Family Students” project hi zanin HSSLC Mizo top-3 lawmpuina leh MSU Awards & MSU Special Awards hlanna programme neih hunah dil thei chin leh dil dan tur puan chhuah a ni ang.

Post a Comment

2 Comments

He post chungchanga i ngaihdan lo sawi ve rawh: