Hnam ropuite u, tho r'u le XVIII

- Lalhruaitluanga Chawngte

April ni 24, 1942 a ni a, indopui pahnihna vanglai, khawvel hi indona hmun a ni ber, chung lai chuan. Chhak, thlang, chhim leh hmara Zofate pawh min nghawng a, min nghawng a ni mai lo, kan tel ve. Khami ni-a McCall-a leh Pu Sawithanga leh Pu Bawllliana te inhmukhawm pawh khawvel indopui vanga inhmu, kha indona chungchang ngaihtuaha țhukhawm an ni.

Bawrhsap AG McCall-a chuan Pu Bawlliana lam a'n hawi a, "I pa Pastor ka hria a, a bial khuaah han kal la, Japan spy an kal leh kal loh i han zawt ang a, an lo kal vaih chuan rang takin Aizawl rawn kirin min hrilh dawn nia," tiin a hna tur a'n hrilh a.

Tlangval pakhat hruaiin Tuipui kam khuaah te, Ṭiau kam khuaah te a han kal ta a, tumahin Japan sipai kal thu an lo sawi lo. Chu chu bawrhsap hnenah a thlen a, a tih tur dang a lo hrilh leh:

"Khuangphah leh Hnahlanah han kal la, labour 300 leh commander pathum leh Hnahlan khaw mi CL Khama nen. Tichuan tunah hian Japan sipaiin Burma pum pui an la vek tawh a, British ralthuam an lak tel kan hlau a, a vaiin British General Wing-a te nen Mizoramah, Khuangphahah leh Hnahlanah kan rawn chhawpthla vek a. Ngawi rengin in kal ang a, chu'ng ralthuamte chu... a bikin silai leh a mu leh bomb te chu Aizawlah in rawn phur thla vek dawn nia. I thei ang em chu chu?"

A chhanna chu "Thei ang," tih a ni a, Aizawl ațangin kein Hnahlan leh Khuangphah chu an pan ta a ni.

British-ho ralthuam dah chu an han la ta a, mi 300 rualin Aizawl an panpui ta a ni. Aizawl an thlen chuan Boys ME School-ah an dah a, chuta an dah lai chuan bawrhsap leh General Wing-a te an lo awm nghe nghe.

An lawm ngang mai a, bawrhsap chuan, "Tangkapui ka 'recommend' ang che," a ti hial. Mahse Pu Bawla chuan a duh lo: "A ngai lo, ka duty ka ti a ni mai," tih chu a chhanna a ni.

Kha tlangvalin tangkapui a hnar kha: mahnni tih tur tih hi chawimawina dawn hluahna turah a ngai lo tihna a ni a, a tih tur a tihin mahni hma sial ranin a ti lo tihna te pawh a ni. Hamțhatna uma thil țha ti a ni lo tihna a ni a, thil țha tih hi hamțhatna um nan a hmang lo tihna a ni. Beisei nei rana inpe a ni lo tihna a ni a, phut neia thawk a ni lo tihna a ni.

Tawi tea sawi han tum ila- khelh a nei lo tihna a ni a, pi leh pute ațanga Zofate ze ngaihsan a pu tihna a ni.

Pic: #John_Chhana