Health minister hovin Inkaihhruaina kalpui mek sawiho; A tul angin SEC-in ruahmanna siam dawn

kuminah COVID-19 vanga nunna chan mi 53 awmin, may thla khan nunna chan mi 25 an awm a, June ni 1 – 10 inkara nunna chan hi mi 21 an ni. Nunna chan zinga 50% hi kum 61 chung lam niin, natna benvawn nei hi 60% an ni bawk.


Aizawl, 11th June, 2021: Vawiin khan SAD Conference Hall, MINECO ah Mizorama COVID-19 inkhuahkhirhna kalpui mek thlirho a ni a, he hun hi Health & Family Welfare Minister Dr. R. Lalthangliana'n kaihruaiin, DM&R Minister Pu Lalchamliana, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo, Addl CS Pu JC Ramthanga leh State Executive Committee on State Disaster Management Authority Memberte bakah COVID-19 dona kawnga hmalatu department hrang hrang hotute,  Medical Operational Team, Jt. NGO Coordination Committee  leh Mizoram Kohhran Hruaitute Committee (MKHC), Local Task Force aiawhte an tel.


Vawiin thlirhonaah hian Mizoramah nimin June ni 10, 2021 thleng khan COVID-19 vaccine dose 334790 pek chhuah tawh a ni a, heng zinga mi 52840 hian full dose an la tawh a ni. Kum 18 – 44 inkar vaccine pek kalpui mek chu ngawrh lehzuala kalpui chhunzawm tha tih a ni a, a tam thei ang berin vaccine an lak thuai thuai a tul avangin Central sawrkarin vaccine 2nd dose la turte tana dahthat (reserve) tur a rawn tih pawh chu kum 18 – 44 inkarte tan pek chhuah mai nise tih niin, 2nd dose tur chu a lak hun taka an lak theih nan a tul anga na taka Central sawrkar nawr chhunzawm tha tih a ni. Nu naupai mekte tan vaccine lak a him tawh thu Central lam hotuten an sawi chu a tul anga kalpui tha tih a ni a, a dawngturte chu counselling uluk taka tih pui hnuah an duhthlanna anga kalpui tur a ni ang.

Meetingah hian Containment Zone a chengte vil dan tur leh hmalakna kalpui chhunzawm dang tur chi hrang hrang sawiho a ni a, awlsam zawka mipuiten sample an test theihna turin ruahmanna thar siam a tul thu sawi a ni bawk.
Hripui kai zinga a na zualte an pun chak em avangin inenkawlna hmun tur pawh ruahman belh mek a nih thu sawi a ni a, a hmunhma neih belh pawh ni se a thawktu tur Healthcare Frontline Workers an indaihloh avanga harsatna awm thei sutkian nan volunteers mamawh belhna a nasat thu sawi niin, hmalak dan tur atana thate sawiho a ni.

IDSP hotute hnen atangin Mizorama COVID-19 dinhmun report ngaihthlak niin kumin April thlaa positive hmuhchhuah mi 1655 zinga 58% chu tualchhunga inkaichhawng an nih laiin, May leh June ni 10 thlenga positive hmuhchhuah zinga 98 % hi tualchhunga inkaichhawng an ni.

Non-working age group (hnathawk rua nilo) zinga hri kai pun chak dan tarlan niin – kum 1 hnuai lam zingah hei kai first wave (January 2020 – March 2021) ah mi 20, second wave (April 2021 – June 10, 2021) ah mi 88 an ni a. Kum 1 – 10 inkar hi first wave ah mi 172, second wave ah mi 1209 niin, kum 80 chunglam hi first wave ah mi 15, second wave ah mi 69 an ni.

ZMC RTPCR laboratory ah sample 59612 test tawh niin positive 2918 (6.16%) hmuhchhuah tawh a ni a. kuminah COVID-19 vanga nunna chan mi 53 awmin, may thla khan nunna chan mi 25 an awm a, June ni 1 – 10 inkara nunna chan hi mi 21 an ni. Nunna chan zinga 50% hi kum 61 chung lam niin, natna benvawn nei hi 60% an ni bawk.

Tun dinhmunah Mizoram pumah CCC 49 awmin mi 2479 dah theihna a ni a, Aizawl bikah CCC 15 awmin mi 1158 dan theih a ni. CCCC hi Mizoram pumah 168 awmin mi 3519 dah theihna a ni a, Aizawlah 109 awmin mi 2243 dah theih a ni. Paid CCC hi aizawlah 2 awmin mi 41 dah theih a ni.

Vawiin  meetingah hian Lockdown kalpui lai mek sawiho a nih bakah karleh lama kan awm dan tur atana tha nia hriatte sawiho a ni a, sawihona ah hian Local Task Force, MKHC, MOT leh Jt. NGO Coordination hruaitute bakah COVID-19 dona kawnga hmalatu sawrkar department hrang hrang hotuten zau takin ngaihdan an sawi a, a tul angin State Executive Committee on State Disaster Management Authority in ruahmanna an siam ang.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post