Health Minister hovin Hripui dona a hmalak dan thlirho

Aizawl | June 8, 2021: Vawiin khan Health Minister Dr R Lalthangliana hovin SAD Conference Hall, MINECO-ah Mizorama COVID-19 Second Wave thawk mek chungchang thlirho a ni.




Meetingah hian Medical Operational Team on COVID-19 in COVID-19 second wave thawh chhunga Aizawl khawpuia hripui kai tam zualna veng 14 an zirchianna report an tarlang a, heng veng 14 ah hian sample 15,837 lak a ni a, chung zingah chuan hri pui kai mi 2522 an awm a ni. An zirchianna ah hian hmai tuamna (mask) fimkhur taka vuah leh hmang tha zingah hripui kai pakhatmah an awm lo tih an hmuchhuak a, SOP tha taka zawmna vengah hri an inkaidarh nasa lova. Hri kai zawng zawng zinga 85% hi chhungkua, thian intlawh tawn, chhungkhat laina intlawhpawh leh thenawmte nena intlawhpawh nasa an ni.

IDSP reporta a lan danin April ni 1 atanga June ni 7 thleng hri kai 9520 hmuhchhuah a ni a. Heng zinga mi 1325 (April – 692, May – 609, June – 24) hi Mizoram pawn atanga lo lut an ni. Positive contact atanga hri kai mi 5376 (April – 573, May – 3768, June – 1035) niin, hri kaina chhui ngai hi mi 2819 (April – 390, May – 1891, June – 538) an ni. Positive hmuhchhuah zinga 56% hi symptom  nei niin, 44% in symptom an nei lo a ni.

COVID-19 second wave chhunga Aizawl khawpui area a hri kai tam zualna vengte chu Chhinga Veng, Saron Veng, Electric Veng, Bethlehem Vengthlang, Bawngkawn, Ramthar, Bethlehem, Dawrpui, Chanmari leh Tuithiang an ni.
Vawiin meetingah hian Containment Zone kalpui dan thlirlet niin hmasawn ngaihna laite leh tun aia awmze nei zawka hmalak chhunzawm dan rawtna chi hrang hrang ngaihthlak a ni.

Home Isolation, CCC leh CCCC a inenkawlte tun aia awmze nei zawka  vil (monitor) dan turte pawh sawiho niin, heng hmuna damlote leh daktawrte inbiakpawh zung zung theihna tur ruahman tum a ni a. Daktawr thiam rual chi hrang hrang, pension tawhte thlengin hripui kai damlote enkawl dan tur rang taka ngaihtuahn zung zung tir Scientific Study Team din a nih thu tarlan ni bawkin, COVID-19 hri kai  ZMC a ventilator nena enkawl, dinhmun  ziaawm deuh hlek, ventilator mamawh tawh lo mahse oxygen nena vil uluk la ngai si te dahna tur MINECO-a MRB office sak thar pawh a satu contractor ten MRB hnena an hlan chhawn veleh luah theih a nih tur thu tarlan a  ni.

State-level Administrator on COVID-19, chief secretary ni bawk Pu Lalnunmawia Chuaungo chuan kum 18 – 44 inkar ten vaccine an lak kim theih nan theihtawp chhuaha tan an lak thu sawiin, hei hi an ngaih pawimawh ber a nih thu a sawi bawk a ni.

Meetingah Chief  Secretary Pu Lalnunmawia Chuaungo, Health Department secretary Pu R. Lalramnghaka bakah Aizawl bawrhsap, DM& R leh H&FW hotute, Police hotute,  Indian Medical Association,  Non-Government Hospital Association of Mizoram  leh  Medical Operational Team on COVID-19  aiawhte an tel a ni.

Post a Comment

0 Comments