COVID-19: Kum khat chhunga hripui thihpui aiin April - May 2021 chhunga thihpui tam zawk; Thla 12 chhunga hri vei hmuhchhuah aiin May 2021 chhunga hmuhchhuah tam zawk!

Aizawl | June 1, 2021: Mizoram State Spokesperson on COVID-19 Dr. Pachuau Lalmalsawma chuan Mizorama COVID-19 second wave dinhmun sawifiahin, Mizoram tun dinhmun,  May ni 31, 2021 thlenga Mizorama COVID-19 hri kai tawh zat chu mi 12,399 niin, thi zat 41 a ni a, hri kai Aizawl district bikah mi 8512 (68.65%) awmin, district dang belhkhawm chu mi 3887 (31.35%) a ni, a ti.

Sawrkar thuchhuahin a tarlan danin, COVID-19 1st Wave (March, 2020 – March, 2021) chhungin positive 6131 hmuhchhuah niin mi 11 in nunna an chan. COVID-19 2nd Wave (April - May/2021) chhungin positive 7923 hmuhchhuah an ni a, nunna chan mi 30 an awm a ni.

2021 May thla chhungin Hri kai hmuh zat hi 6268 a ni a. Thla khat chhung ringawta hri kai hmuhchhuah hi a hma thla 12 (nikum March thla atanga kumin April thla) chhunga hmuhchhuah zat 6131 aiin 137 in a thahnem zawk hi a manganthak ru viau a ni, a ti a.

Dr Pachuau Lalmalsawma

Thla kal liam ta May thla chhung khan district hrang hrang zirchian hnuah Aizawl District-ah COVID-19 hri kai an tam zui ber zel a, he thla khat chhunga Mizoram puma hri kai belhkhawm atanga za a 69.62 (%) an ni.

Kumin May thla chhunga hrik kai 6268 atang hian symptom nei lo hi a chanve aiin an tam hret bawk (50.62%).

Kumin May thla chhunga hri kai hmuhchhuah 6268 a za a 26 (%) chu State pawn atanga rawn haw niin, zin haw zinga case hmuhchhuah danah an lo luhna hmun (entry point) a COVID-19 hrik kai hmuhchhuah nghal hi 160 an nih lain, zin haw zingah mi 449-te chu a hnu lamah hri an kai tih hmuhchhuah a ni thung.

Second wave (April leh May 2021) chhung hian COVID -19 vanga thi 30 lai awmin 1st Wave chhunga thi (11) aiin thi zat hi 30 laiin a tam zawk a ni.

Covid-19 second wave a heti taka a hrik kai leh thi kan lo tam ta hi lu haina tham tak meuh meuh a ni.

Chik taka bih chianin tun dinhmunah hian zin hawte atang ai mahin tual chhunga positive–te atanga inkaichhawnna hi Mizorama COVID-19 tihluartu a ni a; a chhan bulpui ber pawh mipui lamah vanduai bikte chu awm theih ni bawk mahse nunphung leh chetzia a kan pawlawh leh ngaihsam, inthlahdahna avang a ni berin a lang.

Chuvangin

1) Lockdown lai a ni emaw, ni lo emaw, dawr hmun leh punkhawm theihna hmun sa leh chawhmeh dang leh mamawh leinaah tih tak zeta fimkhur a tul ngawih ngawih a

2) Mahni inchhung khurah pawh uar leh zuala fimkhur a tul bakah Colony a ni emaw, compound khat a ni emaw, thenawm intlawhpawh loh hun, vak cheh deuhten nasa taka midang kan kai theihna hun a nih hriain mi dang tlawh pawh loh tur a ni.

3) Zuk leh hmuam leh chawhmeh insuah thlengin insum a ngai ang. Thil inban tawm leh mi khawih hnu khawi atang te, khuh leh tawng per te atanga COVID-19 hi awlsam taka kai theih a nih avangin heng lakah hian fihlim hram tur a ni.

4) Dawr hmunah pawh kan thil lei turah bur chatin kan lei tur ni lem lote chu mi dang lo khawih hnu a nih theih avangin khawih lawr chiam loh tur a ni.

5) Mithiamte zir chhuah danin ZUK LEH HMUAM hian kan ka leh thawkna dawt mai bakah chuap thlenga a khawih chhiat thin avangin enkawl buaithlak khawpa na taka awm theih a nih avangin tun hun tha hi simna hun atan hman hlauh nise

6) Vaccine la tawh te pawhin midang, kan chhung leh khat, then leh rualte kan la kai theih fo avangin a hrik kai lo tura COVID Appropriate Behaviour kan tih - Mask a hmui hmai tha taka tuam te, midang hnaiha awm loh te, kut tihfai that leh in chibai thlenga ti lova fimkhurna kalpui tur a ni.

7) Fimkhurna hi a man a tlawm, pawlawh erawh a man a tovin nunna thlenga chan theihna a ni.

8) Lo fimkhur zel ang che.