COVID-19 3rd wave inpuahchah nan Assembly special session neih a hun - Lalduhoma

Aizawl | June 11, 2021: ZPM Leader leh Serchhip bialtu MLA ni bawk, Pu Lalduhoma chuan sorkarin Covid 19 hri leng karah mipui nawlpui endik pawh a kalpui theih loh laia insensona tur, Rawmi a la buaipui chu a pawi hle a ni a ti.

DD News Mizoram

Thuchhuah siamin, Pu Duhoma chuan, Sorkar laipuiin hripui leng kara damlo enkawlna tur hmanraw leina tura hman theih tur a duan pawh tun thlengin Mizoramin a la hmang tangkai lo leh hmanrua leh thawktute indaih lohna chu hripui kan do zawh lohna chhan ber pakhat a la ni chu a pawi a tih thu a sawi.

Hri leng thawh thumna lo thleng leh tur atana inpuahchah a, thawktu indaih lohna hnawhkhah leh inkharkhip avanga eizawnna khaihlaka awmte chhawmdawlna tur Special Economic Package siam vat te, Health Care Scheme hnuaia damlote Bill tang nasa lutuk chinfel vat te chu hna pawimawh hmasa a nih thu a sawi a, ruahmanna fel tak nena hri leng hmachhawn a nih theih nan Budget ennawn tura Assembly Special Session nei turin Chief Minister a ngen bawk.




PRESS STATEMENT OF LALDUHOMA, MLA, LEADER ZPM
No.ZPM/LD/’20-‘21/02 Dated 10th June, 2021


Kan hriat angin, Covid - 19 hi kum 2019 - ah China atanga rawn darhin, 2020 kum tirah chuan khawvel ram 26-ah a darh hman der tawh a. WHO pawhin Health Emergency a puang nghal a. India Sorkar pawhin State leh UT te chu he hripui laka lo inralring turin a hriattir nghal a nih kha.

March 2020 atangin he Hripui hian Mizoram pawh min rawn nuai ve ta a. Kum tawp lamah chuan lo ziaawmin, mi thiamten an puan lawk, a thawh hnihna lo thleng tur atana inbuatsaihna hun pekin kan awm a. April 2021 atang chuan a thawh hnihna chuan nasa lehzualin min rawn nuai ta ngei a. Tunah phei chuan kan hmuh leh hriat angin thla hnih dawn lai mai inkharkhip a lo ngai ta hial a. Mi tam takin an eizawnna chhunzawm thei lovin, chhuanchham mai hmabak engemawzat kan lo awm ta hial mai a. Association 70 chuang inchhunkhawmna Mizoram Business Coordination Committee pawhin an manganzia an rawn au chhuahpui ta a. Sorkar hmalakna duh khawp lohna ri pawh a ring sawt ta hle mai.

Central Sorkar chuan a tirte atangin hma a la nghal a. State Sorkarte hnenah tanpuina leh ngaihhnatthiamna chi hrang hrang a pe chhuak reng a. January 2020 atanga hman nghal turin COVID-19 Emergency Response and Health System Preparedness Package chu a duang nghal vat a, hei hi March 2024 thlenga hman tur a ni. He package hi state sorkar-ten an mamawh hrang hrang – thawktu lakbelhna leh training atan te, Ambulance lei nan te, ICU din nan te, Equipment hrang hrang - Ventilator, Oxygen, Testing Kit leh damdawi lei nan te, Laboratory leh Hospital din leh tihchangtlun nan te a hman tur a ni a. Heng atana sensote hi a vaiin central sorkar tum tur a ni. He package hi a that tehreng nen, kan hmang tangkai thiam lo deuh nge ni, vawiin thlengin laboratory pakhat chauh ringin kan la awm a. Hmanrua leh thawktute indaih lohna chu hripui kan do zawh lohna chhan ber pakhat a la ni ta cheu a ni.

Nikumah MLA ten kan Fund atangin cheng Rs 25 lakh (nuai sawmhnih panga) theuh kan thawh bakah Rs 15 lakh (nuai sawm panga) theuh cut leh a ni a. Electric Bill te tisangin sorkar hnathawk hlawhte pur a ni a. Contractor Bill te hrensak an nih bakah Tar te, Hmeithaite leh Rualbanlote pension chena hrensak a ni chungin, hripui lakah kan la him chuang lo.

Kum 2019-20 Budget kha hripui a lo leng dawn tih hre lova siam a ni a. 2020-21 Budget erawh kha chu hri lo len tirha siam a ni a, mahse, inbuatsaih hman a ni lo va. Hripuiin min rawn nuai tak avangin ennawn ni se tiin kan rawt a. Mahse, kan rawtna chu hnawlin, kum tawpah Supplementary Demand hmangin kan inpalzut ta kha a ni a.

Kum 2021-22 Budget hi chu hripuiin min nuai lai leh, a thawh hnihna a lo thleng leh dawn tih hre saa siam a nih avangin, beiseina sang tak nen kan lo thlir a. Mahse, kan Budget hman lai hian hripui dona lam a hawi ta chuang hauh lo mai a. Duhsak ber tura ngaih Health Department Budget chu a hma aiin a lo tlem ta hlauh zawk a.

Tunah hian hripui thawh thumna kan hmabak mek a, naupang lam a hrut zual dawn nia sawi a ni. He hripui hi ruahmanna fel tak nena kan hmachhawn theih tawh nan, Budget hi ennawn a tul a, ngaih pawimawh hmasak tur (priority) kan thlan fel a ngai. Hemi atan hian kan Chief Minister zahawm tak hi Special Assembly Session nei turin ka ngen nawn leh a ni. A tlachawpa kal a, Session-a pharh si lova duh ang anga Budget siksawi a, kum tawpa Supplementary Demand hmanga inhrut  leh thin thlakhlelhna hi kalsan ngam a hun tawh a ni.

Khawl leh hmanraw dang leite pawh hi Centralise a, Inventory fel tak neih a ngai a. CHC leh PHC sakna tur Restricted Tender engemaw zat pek a ni reng bawk a. Heng zawng zawng hi mumal taka house-a putluh a, sawiho va, langtlang taka kalpui a tul a ni.

Tuna kan mamawh ber pakhat chu thawktu lakbelh hi a ni. Mizoram-ah hian Nurse post ruak 170 chuang awm mekin, ZMC bik-ah hian post ruak 85 zet a awm a. Nikum January ah daih tawh khan Nurse 50 la turin Advertisement chhuah a ni tawh a, hei hi tun thlengin lak a la ni lova, tunah Staff Nurse 26 lek lak tum mek a ni chauh a ni. ICU leh khumte neih belh zel tura ruahman nimahse, thawktute an pun chuan si loh avangin an hah em em a ni. NHM hnuaia nghet lova thawkte hi vawiin thleng a min tung ding hram hramtute an ni a, an dinhmun ngaihtuah a ngai hlein ka hria. 

Lockdown avanga eizawnna khaihlak tam tak an awm ta a. Heng mite chhawmdawlna tur Special Economic Package hi siam vat a ngai a. Lockdown chhungin khawpuia miten thlai thar lei tur an nei lo va, thingtlanga miten hralhna tur an nei lo bawk a. Vegetable Supply Chain mumal tak duan a ngai bawk.

Health Care Scheme hnuaia damlote Bill a tang thep thuap a. Damloten an rulh tlak vek phawt a ngai a. Tunhmaa Golden Card hman lai kha a ngaihawm ta rum rum mai, chinfel vat a ngai.

A pangngaia Office kal theih a nih tak loh avangin, Office Expense atana sum dahte kha a tihtlem theih bawk ang.

Random Test pawh nei zui ngam lo khawpa Sorkar a harsa emaw kan tih laia Restricted Tender za chuang inpek reng si te leh, mipui mimir pawhin a hmutu tur an hriat sa reng Tender chhuah te hian mipui rilru, a bik takin, Frontline-a thawktute rilru a tihnual a, sawi ho a tul bawk.

Heng a tlangpuia kan han tarlante hi sawi ho va, ruahmanna fel tak siam turin, Special Session neih hi a tul takmeuh a ni.

A tawp berah chuan, kan Sorkarin ruahmanna a siam ang ang te hi, rilru na deuh chung pawha zawm hram hram hi kan zavaia thatna tur a ni tih hriain, thuawih taka awm zel turin mipuite ka sawm a che u.

(LALDUHOMA)
Leader
ZPM Gen. Headquarters
Aizawl, Mizoram.

Post a Comment

0 Comments