Tuichang tihbawrhban duh lovin NOC hal; Save Tuichang Movement a alh zel!

• kan thâwk tawp thlengin kan dodal dawn!

Aizawl | May 11, 2021: Tuichang lui dunga ṭiau/balu lak theih nana, ABCI infrastructure pvt ltd. hnena Geology & Mineral Resources Department-in, nimin May 10 -a NOC a pek chhuah chu vawiin khan Save Tuichang movement kalpuitu, HSJAC leh Hnahthial Ṭhalai Pawl chuan halin, Sorkar hian NOC hi pe mahse, company hian riverbed material hi an lak kan remti lova, kan lui dung, Hnahthial tui tlan  tih bawrhban kan remti lova, lo la lui pawh ni se, Hnahthial khaw chhunga an phurh tlang kan phal lova, he hmasawnna hna thawh mek hi Tuichang lui dunga ṭiau leh GSB tel lo hian a thawh theih tih kan hria a,  kan thâwk tawp thlengin kan dodal dawn a ni' an ti.

NHIDCL hnuaia contractor pakhat,  ABCI Pvt.Ltd, te hian JICA loan assistance hnuaiah Km 166.00  aṭanga  Km 208.00 (package-4) Aizawl to Tuipang section,  EPC  mode hnuaia an thawh mek atana Geology & Mineral Resources department- hnenah hian Nikum december thla khan Permission a lo pe tawh a. He permission hi thla 3 chhung nungin, Cubic metre 3000 lak phal sak an ni a, mahse, Cubic Metre 5000 chuang an la chhuak a, an chetna hnuhma, ṭiau an lak chhuahna khuar thuk takah hian nikum May ni 7 khan Hnahthial nula Sawmi chu che sualin, a nunna a lo chan tawh a ni.

May ni 10-a Geology & Mineral Resources department-in NOC a pek  chhuah dan hi Mizoram Mineral Concession rules 2000 ang pawhin dan kalh a ni a, he dan hnuaiah chuan mining permit reng reng hi ram leilung fa, Mizoram a piang, Mizo ngei hnenah chauh pek tur a nih laiin, Manager ABCI Infrastructure Pvt Ltd.hnenah NOC hi an pe a ni.

Hnahthial Students' Joint Action Committee on Save Tuichang chuan Hnahthial tui tlan, Tuichang lui dung humhalh hian nasa takin hma an la tawh a. Environment humhim leh tuihna humhalh bakah, lui dung nungchate venhim leh humhalhin nasa takin ke an pen mek a, He order an hmuh rual hian Hnahthial ṭhalai eng emawzat chuan Tuichang lui hi pan nghalin,  peaceful agitation an nei nghal a, sorkarin order a sut hma loh chuan Tuichang lui dung hi chhuahsan an tum tawh lo a ni.

He Save Tuichang movement-ah hian Hnahthial Mipui an ṭangrualin, tuihna humhalh leh environment vawnhim kawngah hian an phur em em a, Hnahthial tuilakna tih bawrhban an remti tawh lo a ni.

Vawiin chhun dar 1:00pm-a NOC an halnaah hian SOP zawm chung leh zah tak chungin an hal a ni.

Anmahni lam kam chhuak:

Vawiin Save Tuichang Movement Report tawi:

Nimin lama ruahmanna kan siam angin vawiin(11th May 2021) khan DGMR aṭanga ABCI Infrastructure Pvt. Ltd. te hnena NOC/Permission pekna lehkha chu kan hal a. He huna min rawn ṭawiawmtu Sub-Headquarters YMA Hnahthial, MHIP Sub-Headquarters Hnahthial te chungah lawmthu kan sawi tak meuh a. Kan hmalaknate mipui hriata min puanzar saktu MJA Hnahthial te chungah lawmthu kan sawi bawk a ni.

Tunah hian Save Tuichang Movement member engemaw zatte chu Tuichangah kan la riak zel a. Sorkar hian ABCI Infrastructure Pvt. Ltd. te Permission a withdraw sak hma chu ABCI Infrastructure Pvt. Ltd. Stock Point aṭanga Tuichang an panna hi kan dang zel dawn a ni. Hmalakna kan neiih zel turah Hnahthial khawtlang mipui support-na kan ngen tak meuh meuh e.

Heti'anga chhun zan zawma Tuichang venga kan riahluh takah chuan ei leh in thu hlaah mamawh hrang hrang kan nei a. Kan thawhkhawm angin rei a daih dawn si loh avangin mi ṭhahnem ngai tam takin sum fai leh ei in tur min rawn pe reng a. Heng a hnuaia kan tarlan, min ngaihsaktute zarah hian kan thla a muang hle a ni.

1. Pu Thangliana Chhangte, Chanmari Hnahthial

2. Pu H. Hmingthanzuala, Electric Veng Hnahthial

3. Pu Rammuanpuia Pachuau, Bazar Veng Hnahthial

4. MHIP Sub-Headquarters Hnahthial

5. Pi Lalhnehthangi, Durtlang, Aizawl

6. Pu C. Laldintluanga, Model Veng, Hnahthial

7. Pi Biakchungnungi Electric Veng, Hnahthial

8. Pu B. Lalrinliana, Chanmari, Hnahthial

9. Rev. H. Lalfakzuala Electric Veng, Hnahthial

10. Hnahthial Ṭhalai Pawl

11. Tv K. Lalsangzuala(Hnahthial Art), Model Veng, Hnahthial

Heng bakah hian kan riahna atana kan mamawh Generator min hawhtirtu Tv Malsawmkima Sailo(Tungchaw Architect), Model Veng, Hnahthial, Silpouline min hawh tirtu Pu K. Rodingluaia, Model Veng, Hnahthial, Bench leh No min hawh tirtu Model Branch YMA te chungah lawmthu kan sawi bawk a ni.

Tunah hian ABCI Infrastructure Pvt. Ltd. te hi an Permission-a a lan dan chuan Ni 28 chhung Tuichang a hnathawhna hun an la nei a. Sorkar hian kan ngenna anga, Permission hi a Cancel lo anih chuan he Ni 28 chhung hi Tuichang ah hian riakin kawng kan dan chhunzawm zel ang.

*Loh theih loh pawh ni lo, hlawkna duh vang chauha mihring thiamna in a siamchhuah ve theih loh leilung mawina leh hausakna suasam zawnga hmasawn tumna hi a siamtu Pathian zah lohna a ni*

Ramengliana

Info. Secretary

Save Tuichang Movement