TKP Ramthim Ni – May 29

Aizawl | May 29, 2021: Vawiin, May 29, 2021 (Inrinni)hi Mizoram Baptist Kohhran Ni pawimawh (Special Day) niin, BCM hnuaia thalai pawk 'Thalai Kristian Pawl (TKP) te pual, “TKP Ramthim Ni” a ni a. Kumin TKP Ramthim Ni thupui hi “Thil tha ti atana siam (II Ephesi 2:10)” tih a ni a.  Kum dangah chuan TKP Ramthim Ni-ah hian MTKP atanga ruahmanna an siam zul zuiin inkhawm leh tawngtai programme te siamin urhsun takin hun an hmang thin a, Mission rawngbawlna lama Thalaite cho thar leh nan te, Missionary te puala tawngtai leh Tawngtai programme te siam thin a ni bawk.

Nikum lam ang bawkin, kuminah pawh Covid-19 hri leng avangin rampumah a huhova thiltih leh punkhawm theih a la ni lo va. Kohhran te pawh hun rei tak Biak Inah inkhawm leh thil tih ho a rem loh avangin TKP Ramthim Ni programme siam pawh a rem dawn ta lo a ni. TKP Ramthim Ni thupui hmanga MTKP Secretary Rev. K. Lalbiakenga thuchah erawh MTKP Youtube-ah te pek chhuah a ni ang.

Kumin TKP Ramthim Ni-ah hian tawngtai subject siam a ni a, Inkhawm leh programme dang hmang thei lo te pawhin he tawngtai thupui hmang hian mahni renchan ang zel a TKP Ramthim Ni puala tawngtaina hmang theuh turin MTKP Headquarters chuan Unit tina TKP member te leh Kohhran mite a chah  a ni.

“TKP Ramthim Ni” lo chhuah dan :

TKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District TKP Inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni.

1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin a rel leh a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.

Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thin a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H. Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan TKP Ramthim Ni hi May 29-ah hman a ni ta a ni. TKP Ramthim Ni-ah hian inkhawm buatsaihin, thawhlawm pawh Headquarters-ah lutin Mission rawngbawlna atan hman thin a ni.