Sihhmui mipuiin Aizawl Electric veng mipui tan chawhmeh tam tham tak pe

Aizawl | May 27, 2021: Sihhmui khawtlang mipui chuan vawiin chawhnu khan Electric Veng (Aizawl) khawtlang mipui tan Chawhmeh thlai thar eng emaw zat an pe.

Sihhmui khua te hian Electric Veng tan hian vawiin chawhma lam khan khawtlang huap chawhmeh zawn hnatlang koin, chawhmeh an zawng khawm a. Aizawl West - I Bialtu MLA Pu Zothantluanga chuan hnatlang hi a tel pui nghe a ni.

Chawhmeh te hi Pik-up trip hnih (2) hmangin Sihhmui aṭanga lo phur chhoh a ni a. Chawhnu dar 1:30 velah Electric Veng lo thlengin, Electric Veng Local Level Task Force Chairman F Saichhunga'n lo dawngsawng a, EYMA Hall No - 2-ah Sihhmui Village Task Force te nen inkawmhona neih zui nghal a ni.

Electric Veng Local Level Task Force chuan Sihhmui Village Level Task Force te do let nan ₹10,000 leh Silpauline pariat (8) an hlan.

Chawhmeh thlai hnah leh thei eng emaw zat Electric Veng khawtlang in an dawn te chu - Behlawi, Maian, Tumbu, Kuangkuah, Dawlzik, Chakawk, Theifeihmu, Theihai, Anthur, Saisu, Rawtuai, Rengan, Ankasa, Nimbu, Balhla, Bawkbawn, Aidu, Lengser, Hmarcha, Anhling, Runhmui, Lambak te an ni.

Heng Chawhmeh  te hi electric veng vengchhunga chhungkaw 130 bawr velah sem chhuah a ni.

Tunhnaiah Electric Veng LLTF te hian Chanmari, Dawrpui Vengthar, Tlangnuam, Saipum leh Sihhmui Khua te hnen aṭangin Chawhmeh ṭhahnem tak an dawng tawh a, hrileng avanga Electric Veng khawtlang harsat hlauva, duhsakna an dawng hi Electric Veng Local Level Task Force te chuan thinlung takin lawmthu an sawi a ni.