School Education-in session thar atana class zawng zawng suspend vek; Admission erawh online hmangin tih theih

Aizawl | May 12, 2021: Vawiin May ni 12, 2021 khan Mizoram sorkara Directorate of School Education chuan a hnuaia mi ang hian Thupek a chhuah a ni.

Mipuite himna tur leh Covid-19 avanga Lockdown hnuaiah class neih tan leh dan tur chungchangah hetiang hian fimkhur taka kaldan tur ruahman a ni a, thupek dang awm leh hma chuan heng hi zawm nghal vek tura hriattir an ni e :

i) Academic Session 2021-2022 thar atana class zawng zawng (Pre-Primary atanga class XII) te chu hriattirna dang awm hma chu suspend vek a ni.

ii) School admission turte chu online system hmangin tih theih a ni ang.

iii) Pre-Primary atanga Higher Secondary School zawng zawngah class pangngai (normal class) te chu hriattirna dang awm hma chu suspend vek a ni.

iv) Normal class khaihlak (suspend) chhungin a theih chin chinah online class neihpui phal a ni thung ang.

v) School leh zirna in dangte pawhin Online Class neihdan tur atana prescribed norms chu uluk taka zawm vek tur a ni. Rei tak taka online class neihpui leh in lama zir tur tam lutuk pek loh hram hram tur a ni ang a. Sorkarin a duan ang ni lo, syllabus, subject emaw lehkhabu dang engmah zir belhpui phal a ni lo. He thupek bawhchhiaa tilui an awm a nih chuan dan anga hrem theih an ni ang.

vi) SCERT-in a buatsaih ‘4-Week Alternative Academic Calendar for Elementary Schools in Mizoram’ (2020-21) chu Elementary School zawng zawng atan normal class suspend chhungin hman tur a ni ang.

vii) MBSE buatsaih ‘Week-Wise Plan for Secondary and Higher Secondary Schools' (2020-21) chu Secondary and Higher Secondary Schools zawng zawng atan normal class suspend chhungin hman tur a ni ang.

viii) School hostel zawng zawng thupek dang chhuah hma loh chuan khar vek tur a ni.

ix) School Education Department-in Standard Operating Procedure (SoP) a siam hi fimkhur leh uluk taka zawm vek tur a ni.

- DIPR