SAVUN KAWRFUAL A THLER TA!

(Rev Lalhmingchhuanga Jongte thlahna thu kam hnih khat)
-------------------------------------------------
- Tluangtea Hnamte
Ni 29 Țomir Thla, 2021(Inrinni)



Amah ka hriat țanna hmun chu MTKP Inkhawmpui-2013 Haulawngah khan niin, a hmun leh a hun tak pawh, MTKP inkhawmpui-2013 pandal platform-ah, kum 2013 Vau Thla, ni 23(Inrinni, hei, vawiin thlafâm a channi ang hun chiah lah niin) kha a ni.

Rev Lalhmingchhuanga Jongte

Kha mi ni kha MTKP Inkhawmpui programme zinga pakhat 'Work Shop' hunah hman niin, thupui hrang hrang zir bing nan hman a ni. Thupui zir bing tur kha hmun 4-ah țhen niin, resource person hran țheuh ruat an ni. Inkhawmpui palaite kha mahni tuina leh duhna hmun lam lama kal mai tura ruahmanna hi siam a ni. 
Hemi țum hian 'Țhalaite leh Electronic Media' tih hi thupui zir bing tur pakhat zingah telh a ni a, resource person atan Rev Lalhmingchhuanga Jongte niin, a zirna hmun atan hian Pandal ruat a ni. Thupui zir bing tur hrang hrang zingah khan, he thupui hian min lêmin, nghavawk zinga nghahrah chheh hran ang maiin ka mit a la ding fal nghal nalh a. Inngaihtuah buai khawtlai eih lovin, pandal lama kal chu thlangin kha mi hmunah ngei khan a ni ka tawn takna chu.
Mahni buh țhaț vena mual lama bung leh chetla ka nih piah lamah kan lawmrawih pa (resource person) kha rawih mân a lo awm bawk nen, khami ni kher kha chu 'Lalmanga nu lawmrawih ni'(21, Nikir Thla) ni se ka ti kher mai. Ka kham lo takzet a ni.
Kha mi țuma a thusawi tam tak zinga ka theihnghilh theih tawh loh leh vawiin thlenga ka hringnun tawlailir min nawr kal fotu hi ka han phawrh chhuak thar leh teh ang:
"Khawvel chângkânna leh hmasawnnate hi kan pawng do ngawt tur a ni lo va, kan basa ngamin kan mikhual nula zuam ringawt tur lah a ni lo. A chhe zawnga kan nun min hruai theitu a ni ang bawkin, kan tih theih loh min tih tir theitu leh kan nih phâk ngai loh tura kan râl thlir hmuna min hruai thleng theitu hmanraw chak tak a ni a. A chhe zawnga hmangtu tam tak zinga țangkaipuitu leh țhat puitu tlemte zinga mi nih lo tum zel ang che.."
He a thu sawi tawite avang ringawt pawh hian vawiina kan thlah liam tak, Rev Lalhmingchhuanga Jongte hi ka tan chuan mi hlu tak, a bûk tawk lunghlu phu reng tawh tur a va ni em!



Amah ka hriatna pakhat leh chu, kum a kal leh det tihah amah ka hriat tirh ni ațanga kum 4 a liam hnu, kum 2017-ah khan, Mizo Academy of letter ten kum 1989 ațanga vawiin thlenga kum khat chhunga mizo țawng lehkhabu chhuak zinga țha ber (book of the year)an thlannaah 'Savun Kawrfual' tih chu thlan niin, a ziaktu chu tu dang ni lovin vawiina kan thlah liam tak Rev Lalhmingchhuanga Jongte ngei hi a ni. A 'Savun kawrfual' avanga amah ka duhna leh ngaihsânna hi teh theih ni ngat se zawng, kan zinga a awm ta lo ka uina nen hian a bûk a in hen ngei ang.
Amah ka hriat lehna dang leh chu tun hnai deuh maia kohhran chung chang a sawina vedio clip tawite, Social Mdia-kal tlanga Amah ngeiin a tihchhuah ka hmu kha a ni. Kha Vedio Clip tawite kha vawi tam tak ka ngaithla chhuak a, he ram tana thuchah pawimawh tam tak hi a va pâi tam em! A tlangkawm nana a hman thu tawite hi ka ha han zep leh zauh teh ang:
"Eng pawl emawa ka nihna ai chuan, Kristian ka nihna hi langsâr zawk rawh se"
Khawvel zet hi zawng hriatthiam a har a ni. "Kan zingah la awmin min la dam pui rih se, kan la mamawh rih viau a sin le", kan tih ten min ngai lo va  ram thianghlimah lêngin, kir rel lo vin an kal tak ang ngawk ngawk a! An ngeiawm let ling ngawt zawk mai!
Hei, chutiang ang mi uiawm tam tak kan lo vâi liamte zingah chuan, kan hringnun sakruak zahmawh khuh bona tur atana Savun kawrfual min tah saka min țhui pum saktu Rev Lalhmingchhunga Jongte ngei pawh a lo tel ve ta rêng mai chu a ni si a le. He thihna leh khawchin hi tu nge hre thiam bik ang le?
Pu Hming, i ti awm ang lo lulai lutuk em mai! He tia i kal bo daih te'n i 'Savun kawfual' min pêk hi a țeh hunah tu nge min țhui sak ta ang?

Post a Comment

He post chungchanga i ngaihdan lo sawi ve rawh:

Previous Post Next Post