RAWNGBAWLTU ‘RETIRE/PENSION’ TAWH TE HI?



• Ka ziah chhan tak ten an chhiar ka ring vak lo.
• Thalai rawngbawltute chhiar ngei tur in ka sawm a che u. 
• A fiah zawk ka beisei avangin sapṭawng tlanglawn ka han hmang tel a ni.



         Hna ah reng reng hian thawhtan theih hun leh chawlh hun hi a awm vek a. Mi chuan experience nei tha viau in hmelhriat pawh nei hnem tawh viau mahse a retire/pension hun a thlen tawh miau chuan mi thar zawk te tan hmun a ken mai hi a hnathawhna in a hlawkpui zawk thin. Chu chu hrelo a, hmelhriat a neih te hmangin emaw, a ngampatna hmun a nih avangin emaw, a thiltihtheihna hmang a la thawh a tum tlat chuan thawhhlawk lam ai mah chuan a hnawk ru tawh zawk fe thei tlat a ni. 
Tun a ka sawi ang hi infiamna khawvel ah  pawh a ni vek in ka hria, Ronaldo, Beckham kan tih te pawh hi football khel thiam viau in an ram leh club tan pawh thawhhlawk viau thin mahse chawlh hun an hriat loh chuan an in ti hming chhe let zek thei a, an team te tan pawh an hnawk ru viau tawh thei  tlat a ni. La lar hle mahse chawlhsan  hun hi a awm a ni. 

Football an la tui viau chuan khel mual ai mah chuan Coach ah te tang se an tangkai duh zawk hle, mi tam tak coach a tang ta te pawh sawi tur an awm ang. Sorkar hna ah leh political party thleng pawh hian a ni vek in ka hria, khel tur leh coach a tang tawh tur hi an awm a, retire tawh tur la inkhelh tum tlat kan ngah lutuk hian eng hna pawh hi a ti buai vek in ka hria, coach hi inkhelhna field ah zuan luh a tum tlat chuan a thawhhlawk lo teh ang chu aw! 
Ti hian ka lo ngaihtuah a rawngbawlna lam ah pawh hian a lo ni ve tho in ka hria. Pathianin rawngbawlna zau zawk leh hlawk zawk nei tura bul min tan tir hun a awm a, retire hun pawh hi a awm bawk a ni. Chumi hrethiam lo tute chu rawngbawlna ah pawh hian an hnawk ru duh khawp mai. 
Ka sawi tum tak hi ngun taka min ngaihtuah chik pui ka duh a ni. Ṭumkhat, Delhi-a ka zin tum in nu pakhat missionary kum 74 mi vel nen hian kan in chibai a, "chu ka pi i pension thak thleng a in thawk thei chu a van lawmawm ve" ka ti chu, "ka la pension hleinem kohhran chuan min ruai tawh lo mahse rawngbawlna ah pension a awm hleinem" ti in min chhang a. Ropui ka ti in ka pawm hle thung. Ka thuziah hi a in kalh hmel viau em, ka sawi tum takah luh pui che ka duh avangin in ngaihtuahna ka han tih zau sak phawt che u a ni. 
Le.. ka han sawi a nge, sorkar leh khawvel lam hna chuan service tan hun an nei a, retire/pension hun a nei a, chu chu an kum atangin an chhiar a an teh deuh ber. Thawhtan theih hun leh chawlh hun chu kum  atangin an chhiar a tih theih ang.

Nimahsela, rawngbawlna ah ve thung chuan kum ah a in nghat ve lova, Hriakthihna(anointing) ah a in nghat a ni. Kum naupang te pawh Lalpan hriak a thih tlat chuan he rawngbawlna hi thawk tur in a tling zo em em a, kum 80 chuang pawh nise hriakthihna a ngaih pawimawh a, a ken nun tlat chuan pension/retire a nei ve lo thung, a ropui a sin. 
Nimahsela, kum la upa lo, experience nei nual tawh, hmelhriat pawh nei ngah tawh avanga rawngbawlna lam ngam ve sarh leh zuam ve em em hi a lo awm theih dawn khawp mai. Hetiang chi hi an kum ah chuan la upa lo mahse a tir ata an hriakthihna hmuh kha an ven (maintain) that loh avangin rawngbawlna tak tak ah hi chuan; la upa lo tak si hian, office tha tak emaw hmelhriat tam tak nei chung si leh experience sawi tur hre teuh chung si hian a retire ve theih tlat a nia. 
Mahni in hriat hi a har khawp a niang, hetiang ho an chet nat deuh tawh hi chuan a tha zawng ni lemlo hian rawngbawlna huang chhung hi a buai leh map thin. 
A chin fel dan tur tak chu ka hre bik lo, Davida tan khan Hriakthih ni ve tho Hriakthih hlui Saula kha a hnawk hle a ni, Saula kha khawvel lam kum atang chuan la upa lo tak la retire/pension tur chu a la ni miahlo a, mipui hian an hre duh zawk khawp a sin, Mipui in Davida’n a sing a sing, Saula’n a sang a sang (2 Sam 18:7) ti a an au chhuah pui tawh pawh khan, Saula khan chawlh mai a la tum chuang hauh lo.
Chu tak chu, rawngbawlna ah leh tun a Pathian hriakthih tan chuan hnawk tak a ni, Davida khan eng ang rilru nge a put chu hre vek lo mah ila, hei hi chu ka hria a ni, Davida khan Saula tan rimchhia a chhuah ngai lo, tawngkam chhia phei chu  sawiloh Saula tan rimawi hlir a chhuahsak zawk thin. 
Retirement leh pensioners te hi engtia tih chi nge ka hre bik lo na in, Rawngbawltute kan in check a, kan nun leh keimahni a hriakthihna kan ngaih pawimawh ber zel theih nan, nizan ka mut dawn leh zing ka thawha ka rilru a awm ka rawn ziak chhuak a ni e.



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments