Ram pawnah Missionary boral

Aizawl |May 10, 2021: Vawiin tlai lam dar 4:45 khan BCM Missionary, Huto Arunachal West Field a thawk lai Isaac Rochunglura chu Chimpu Hospital panpui a nih hnu in a chatuan hmun a pan ve leh ta. 

Pu Saktea ti a koh hi kum 40 bawr vel a ni a, a pa hi Rev. C.Zatawna BCM Pastor(Rtd) a ni a, a pa pawh hi a Pension hnu a nupaa Missionary a chhuak leh niin an sawi.

Covid vangin damdawiin a a awm reng hnu in tukin khan Test Result Negative tawhin damdawiin atangin an chhuak a, vawiin chawhnu dar thum vel khan a thaw hah lehin Ambulance nen Hospital panpui a ni a, an thlen hnu rei vak lo ah hetiang hi a thleng ta a ni. Mary Lalmuanpuii nen inneiin fa pahnih an nei tawh a, a naupang zawk hi hmanni lawka an neih a ni. 

Hri leng hi a runthlak tak zet a, kan Missionary te thlengin harsatna an tawk tih hriat hian rilru a khawih leh zual hle a ni. Kum naupang te a nupui fanau kalsan, pangngai lo taka inthlah liam ngai zui hi a runthlak hle mai. Lusun chhungte kan tuarpui tak zet e.

A hnuaiah hian thuziak dang kan dah e:

Vawiin zet chu ka thu hriat hian min va thawng tehlul em ve aw.. kan nau Isaac Rochunglura Chinzah S/o Rev C. Zatawna Arunachal Pradesh a BCM Missionary hna thawk mek chuan tlai 4.45pm Chimpu Hospital Arunachal Pradesh ah a boral thu in min deng ta tlat mai. !!!!

Kum 20 chuang kal ta ah khan Dhubri Mission field a apa Rev C. Zatawna BCM Missionary (Field Director) a nih laiin Shillongah lehkha zir turin a rawn pu chho ve a. A hma in an awmna Dhubri kal ve fo tawh kan nih avangin naute ang tak tak a neih in TKP velah kan lo chhawr tangkai em em nghal ringawt a. Tlangval hmeltha, ngô lam pang, zakzum leh inthlahrung tak a ni a, kohhran a bel nghal chawt a. MA a zawh hnuin Missionary tana inpe in Mizo Baptist Church Regional Office, Gauhati ah a thawk nghal a. A hnu lawkah kawppui fel tak a nei zui ta a. 

Tlangval senior hnua nupui neih kha a nih ve avangin a fanu upa zawk apian lai hian Gauhati a ka chamlai a ni a, a fanu hmingah fiamthu in i nghak rei bawk a, i fanu hmingah Nghakreii kan ti ang a, Nghkareii pa kan ti ang che ka ti a, a lawm berah te a tang a, kan hlim hle. Mission field hmun hrang hrangah kan in zui nasa a, tawng a thiam bawk a, ka thusawi te tawnglettu ah a tang thin a, naupangte a nih lai a ni na a, a mawhphurhna kha a hlen tha thei em em thin. Ka va ngai tak em aw..

Kum 3/4 vel kal ta ah khan a awmna hmun sawnin Arunachal Pradesh lamah Missionary tura sawn a ni ta a ni.

Saktea ( kan koh duatna) hi inkawmrual ni chiah lo mah ila mimal takin kan inzui ve nasa hle. Gauhati a awm lai hian ka zin ngun avangin hmun hrang hrangah kan in zui nasa thin hle. Tawng a thiam em em a, English mai nilovin Assemese hi pianpui tawng aiin a thiam a, Assamese ho zingah chuan hnàm dang tih hriat loh khawp a, tawng thiam a ni. Amah hi tawng tam lo, mi pawisawi hlau tak, inthlahrung tak a ni a, mawhphurhna ah erawh chuan rintlak em em, in nghahna tling a ni thung. Vai ho zingah kan in zui fo thin a, thil dik lo nia a hriat ah chuan a huai hle a ni tih hi ka hrechiang hle. A thu ah a ding nghet em em a, a rinawm a, a rintlak em em bawk a, tawngkam nâ leh hriam a hman ka hre ngai lo.

Hetianga mi special tak, rintlak leh rinngam, tleirawl sual nei lo, nu leh pa tan pawh a in nghahna tling, nupui fanau leh khawtlang (mizo society ram pawn hruaitu hlun) Kohhran tana hma hunah chhawrnaawm tak tur a nih laiin kum naupangte a nih lai a, min kalsan ta thut hi a pawi vawng vawng a, sawi ngaihna pawh a awm lo.

Sakte, ka ngai hle dawn che a ni. Thlamuang takin a rawng i bawl thin Lalpa hnenah chuan chawl ang che aw.  Kan ngai hle dawn che a ni. 

A fingte chu Van êng angin an êng ang a,

Mi tamtak felna hawikir tir tute chu;

Arsi angin kumkhaw tlaitluanin a eng ang a,

Van thlen thlengin an êng reng ang.

Sakte mangtha  aw 😭😭😭😭

- H.C.Lalmalsawma Zasai