Mizo pastor hriathlawh leh 'Savun Kawrfual' ziaktu Rev Lalhmingchhuanga Zongte a herliam ta

Aizawl | May 29, 2021: Lehkhabu 'Savun Kawrfual' a ziah vanga zoram dengchhuak leh hriat hlawh Rev Lalhmingchhuanga Zongte chua tukin zing dar 4 vel khan Delhi-ah a boral.

Covid-19 vanga ni 32 chhung enkawl a nih hnuah, Rev Lalhmingchhuanga Zongte (55) chu tukin dar 4 khan Delhi-ah a boral.

Rev Lalhmingchhuanga Zongte hi BCM North India Mission Field director nilai niin,  lehkhabu tha leh lar tak 'Savun Kawrfual' ziakin, MAL book of the year ah hial thlan a lo ni tawh a ni.

Thudawnnain a tarlan danin, Rev Lalhmingchhuanga Zongte hi BCM Shalom, Mission Vengthlang Aizawla vui tura ruahman a ni.

Death Summary Damdawi In atangin lakchhuah a ni  tawh a, Monday 31 May, 5:25AM ah Delhi - Silchar an thlawk ang a, Silchar hi dar 11:24AM ah an thleng ang.

Rev. Lalhmingchhuanga hi Upa Siamhleia leh Pi Zaichhingi Hmawngchuan, Zampui Tlang te fa 10 zinga mipaah chuan a naupang ber a ni. 

Kum 2006-2008 khan Banglore-ah MTh a zir a, MTh a zawh hnu hian Mizoramah rawn chhuakin AICS-ah kum 5 chhung lecturer in a thawk. Kum 5 zet lecturer hna a thawh hnuah kum 2013 khan Kerala-a 'Federated Faculty for Research in Religion and Culture' (FFRRC)-ah DTh a ti leh a, thesis te pawh submit vek tawhin, hripui leng hian thil a ti khawtlai a, result hi a la nei ta lo a ni. Kum 2016-ah BCM hnuaia North India Mission Field Director hna thawk tan lehin a thih thlengin he hna hi a thawk a ni.

Tunah hian North India Mission Field Director term, kum 5 hmang zo tawhin Tlabungah post a ni a, April thla chhunga zawm tuma an inbuatsaih laiin hrileng thawhhnihnain ramchhung a ti buai a, hri leng hi an chhungkuain an kai ve ta hlauh mai a, April ni 26 khan damdawi inah dahluh a ni a, a nupui fanaute anga tha chhuak leh mai tura kan beisei laiin tihian min peih loh san ta a ni.

Rev. Lalhmingchhuanga hian ram leh khawtlang nun a vei em em a. Kum 2016-a a ziah, Savunkawrfual tih lehkhabu kha Pi Lalrinkimi leh Pu Lalthanmawia Pachau te nupa, Ophel neitute chuan a senso zawng zawng tumin an publish a, he lehkhabu hian mite chhiar leh ngaihhlut a hlawh em em a ni. Tunah hian lehkhabu dang "Mizo Buanpuite" tih lehkhabu tlangzarh mai theih turin a buatsaih fel leh vek tawh a. Hei pawh hi Ophel neitute hian a senso engkim an buaipui leh vek a ni. 

Hripui leng thawhhnihna avangin dawr hawn theih a ni lova, an chhungkua pawh he hri leng hian ti buai vein, amah ngei pawh khum betin a na chho ta si a, a dam leh hun thlirin hri leng ziawm veleh tlangzarh nise tiin ngaihtuahna kan seng mek a ni a, vawiin kan thil tawn hi a runthlak takzet a ni.

Rev. Lalhmingchhuanga ruang hi embalming te tih a ni anga, a taksa-a virus awmte tih fai a ni anga, thil pawimawh buaipui tul ang angte tihfel a nih hnuah Aizawl rawn pan pui an tum a ni. Embalming tih bakah virus thenfai chhungte a rei deuh maithei a, karleh Thawhtan hi Air India Lengpui a tum loh ni a lo ni bawk nen, Silchar lamah a ruang hi thlawhna hmanga rawn phurh chhoh a ngai maithei a, a vui hun tur hi sawi lawk mai theih a ni rih lo niin thudawnna chuan a sawi.

Pu Avala hi North India Mission Field Director-a a kal dawn hian Shalom Baptist Kohhran Mission Vengthlang atanga tirhchhuah a ni a, a ruang hi Aizawl Mission Vengthlangah lak tum a ni.