Aizawl | May 21, 2021: Sports Minister Pu Robert Romawia Royte chuan boxer Lalbuatsaihi Tuithiang; weightlifter Jeremy Lalrinnunga, Govt Complex leh Indian Hockey Star Lalremsiami, Kolasib te chuan Covid hripui karah Mizote leh India tihmingthain international level-ah te competition an hmachhawn mek a, anni pathum hi Mizoram State Sports Council (MSSC) in sportspersons titha bikte tihhmasawn nana fund tlemte a neih atangin cheng Rs 50,000/- theuh pek an ni dawn, a ti.
 |
| The Three Idols |
Pu Romawia Royte chuan Covid hripui avangin infiammi ti thate puala Incentive Cash Awards sem tur pawh function lian buatsaih theih a nih loh vangin a khawtlai rei tawh a ti a. Hripui avangin infiammiten sum an mamawh nasa zual tih Sawrkarin a hre nain, a reh mai theih si loh avangin Online-a Ceremony neiin Incentive Cash Awards te sem mai pawh a tul mai thei a ni, a ti a. Sports Minister chuan he ceremony-ah hian infiammi 1400 chuang hnenah sumfai lawmpuina sem a nih tur thu a sawi bawk a ni.
Tuithiang Veng nula Lalbuatsaihi chu India ram aiawha Asian Boxing Championship (64 Kg) khel tura thlan a ni a, a inbuatsaih ngawrh hle a. Youth Olympic Champion Jeremy Lalrinnunga pawhin World Junior Championship khel turin Tashkent khawpui a pan mek bawk a. Medal a lak chuan Indian zinga a hmasa ber a ni ang.
Indian Hockey Star Lalremsiami pawhin kumin hian Argentina leh Germany ah India Team rinrawl niin India tan a khel a, tunah India Hockey Camp Bangalore ah a training mek a ni.
Kum 2019 khan Lalremsiami hi Youth Olympics leh Asian Games ah Silver Medalist a nih avang leh a inbuatsaih zel nan Mizoram Sawrkar in cheng nuai 20 a lo pe tawh a, Jeremy Lalrinnunga pawh Youth Olympic Champion a nih avang leh a inbuatsaih zel nan cheng nuai 15 Sawrkarin alo hlan tawh a. Nikum khan Lalbuatsaihi hi World Police Boxing Championship Tokyo-ah champion a lo ni tawh a ni.
Post a Comment
He post chungchanga i ngaihdan lo sawi ve rawh: