Kan/Kohhran Mamawh - THUTAK a Harhna

- K Remruatfela


1. *Thutak/Takna* tih hi saptawng ziak thenkhatah chuan *Truth* tiha sawi thin a ni a. Nimahsela *Genuine/Genuiness* tih hian a nihna a phawk fiah zawkin ka hria. Chu *Thutak/Takna* awmzia ber chu *a derna nung* ni lovin *principle felfai tak nena awm* tihna a ni a. Chu *Thutak* nunpuitu te chu khawi hmunah pawh awm se, Lal Krista *Thutak* an hriatah chuan an ding nghet tlat thin a. Thlemna tinreng hnuaiah pawh  _Krista lungpui nghetah ka ding, hmun dang zawng chu tiau dûp a ni_ tiin nghet takin an awm tlat thin!
2. Kan ram Kristian nun hi han en ila, he *Takna* hi kan tlachham em em a. Lemchanna khawvel dawhsânah a derin kan in lan siak thin ni berin a lang.  Hetianga nun tak kan neih thin loh avang hian Kohhran hmel a balh phah fo thin a. Chu chuan nasa takin kan moral a ei chhia a, dikna a fam a, sualna in ram a la duai duai a. Moral reforms maiin kan ram a siam tha zo tawh lova, Pathian chakna ringa moral transformation hial ka neih a ngai tak meuh meuh tawh a ni.
3. Chu *Thu Tak* chu eng nge kan tih chuan eng dang ni lovin Lal Isua thu zawm leh Lal Isuan nun dan tha min zir tir dan kha zawma nunpui mai hi a ni. Hei hi a rau lai ber pawh a ni bawk! Lalpa'n hmana tha lo a tih kha tun thleng hian tha a la ti lova. Lalpan hmâna Tha a tih kha zanin thleng pawh hian tha a la ti reng a ni. Keini erawh kan boruak tawn inchingchivêt kârah hian kan nghing fo thin a. Biak In chhunga kan khawsak zia leh kan tual zâl nun chu a inmihran hlak a. Biak in chhûngah kan in tih thlarau mi viau thin laiin kut tling lova sum la tute malsawmna kan hnar zo lo fo a, rinawmna kan tla chham bawk a, lei bat kan hreh lova, tharum hman mai te pawh kan pawisa lo fo thin. *Takna* hian kan nunah hmun a chang ta lo hle a ni. A pawi khawp mai.
4. Chutiang chu kan dinhmun a nih avang chuan *Thutakah* kan lêt a hun takzet tawh a. Khuang rang leh Thusawitu awrawl ringin a sawi nghin mai mai theih, phurna a lo reh hnua chuai leh ta em em mai thin nun ni lo, eng boruak pawhin min nêk mah se, _chu Kraws chu pawmin ka vuan zel ang, thlafam dâi rial chang mah ila_, ti tlat thei nun hi Kohhran ho hian kan neih a pawimawh takzet tawh a ni. Lal Isuan nun dan tha min zirtir zawng zawngte kha kan thil tihna kawng tinrengah min hruaitu leh min chelhtu ni tlat thei se la. Chu Krista *Thu Tak* chu kan zawma, kan nunpui tlat chuan kan ram a lo dam leh ang a, Kohhran  hote hi he khawvel tana lei tha, Zoram ti êngtu kan la ni thuai ang a. Lallukhum hlu chu kan la chang thuai ngei bawk ang. Chuvangin, he harhna za zâwi, *THUTAK*-a harhna hi Kohhran hoten kan chan ngei theih nan Kohhran mite Pathian hnenah i inhlan thar fo ang u.

Post a Comment

0 Comments