Hnam ropuite u, tho r'u le XIV

- Lalhruaitluanga Chawngte

1861-a mau a tam hnu khan, 1911-ah a tam leh a, a hma ang bawkin țamin a zui leh. A hma ang bawkin a na leh hle! Buh a thar lo a, buhfai kan nei ta lo. Chhuanchham leh tlachham hlir mai kha kan inmelh ngawih ngawih mai a ni ber e.

Chumi țum chuan "sorkar" kan hre tawh a, min awptu sorkarin buhfai an chawlut nghe nghe. Mahse an sem lo; a pukin kan puk a, pukah pawh pung neiin kan puk.

Pic: #John_Chhana

Zofate'n buhfai kan ei puk ta lo thei lo a, țam tuar, rilțam retheite tan han rulh rual a ni lo - a thain an rul ta ringawt mai a, kuli-in an rul hlawm. Aizawlah tuikhuahpui laiin an ba an rul bawk. Buhfai ei puk rulh chu a hun laiin he hnam tan hian phurrit a tling.

Chu harsatna hmachhawntu Zofate chuan chhel takin an hmachhawn a, an indawm kun mai mai lo. An ba pawh chhel takin an rul țauh țauh.

Chhum dum phenah hian ni eng mawi tak hi a awm chiang khawp mai a, khami țuma mautam țam pawh kha kan hnamin sumdawn kan chin țanna, dawrkai kan neih țanna a ni ta daih. 1958-a mau a tam leh pawhin, mau a tam vanga țam a tlak leh pawhin mipuiin hnam rilru an put phah a, 'nationalism' no awpkeutu a ni daih. 1918-a khawvela influenza hripui a len pawh khan, kum tawp lamah kan hnamin kan tuar țan a, zawnghri a tel bawk nen, kan tuar nasa hle. Mahse harhna a lo thleng a, hripui tuara rumte thla a muang ta: "Mitthi ngai tam takte kha a rawn thlamuan leh ta em em mai a, a ram pum hian kan lawm leh ta hle mai," Rev Liangkhaia'n a ti alawm. Chu harhna chu biak ina khuang kan lakluh țanna a ni ta hial. He hnam hian harsatna hi a tawng pawng hmachhawn lo a, Pathian zarah rahțha a chhuah țhin. A thlawnin a liam mai mai lo.

Khawvel hi a vir zel ang a, vawiin hi nimin a la ni dawn; kumin pawh hi nikum a la ni ang. Engtik emaw-ah chuan Covid-19 hrilen lai te hi history a la ni ang a, chutih hunah chuan țhangtharte'n "Kha hrileng rapthlak tak kha chhel tak leh chak takin, inthurual leh inlungrualin kan nu leh pa, kan pi leh pute khan an lo hmachhawn a, anmahni suihkhawmtu leh țhuikhawmtu a ni ta daih a. An inhmangaih tawn a, pi leh pute nun mawi a vul lehzual bawk a. Pathian an au a," an la ti ang.

Hrileng kara kan zirchhuah, chhum dum kara ni eng kan hmuh te chu chhuang takin an sawi ang a, khawfing a chah dawnin khua a thim mup țhin tih sawifiah nan te pawh an la hmang ang.

1911 mautama bawk kha- buhfai an ei puk kan tih kha; kha phurrit kha a rit em em kan tih bawk kha. An ba rulh nana  tuikhuah lai turin Aizawl-ah an kal sup sup mai a, a khua khuain an kal duah duah țhin. Chuti chung pawhin an rul seng lo. Khatia phurrit phur tura thuawih taka inzui duah duahte kha, Covid-19 hrilengin min nuai laia "Chuta kalte chu in-report tur... chu mite nena lo inhnimhnaite chu in-report tur..." an tih changa thuawih taka in-report țhinte thlahtute hi an ni ka ti lo thei lo. Ka la duhtawk lo - tu'n kan țawng lo haw lo sela - khawtlang leh mipuiin hmun zahawm lo leh zahpuiawm taka an ngaih khawi khawi emawa kal an in-report a ngaih chang a awm a, chutiang chang pawha inzep lova zak chung chunga in-report țhinte thlahtute hi an ni ka ti a ni.