COVID-19: Hmeichhe pakhat boral; Nunna chan mi 21 tling tawh

Aizawl | May 10, 2021: Vanduaithlak takin tukin (10.05.21) dar 5:00 AM khan Pi Lalthianghlimi (68), Kanan Veng chu COVID Pneumonia avangin ZMC ah a boral. April 21 khan hri a kai tih hmuhchhuah niin April 23 ah ZMC ah admit a ni a, April 25 khan ICU ah dahluh a ni.

Thlalak hi Mizoram a ni lo. News tichiang thei tura dah mai a ni.

Ani bakah hian nimin khan Mipa pathumin nunna an chan;

Vanduaithlak takin Pu Lallunghnema (86), North Lungpher khua chu zanin (09.05.21) dar 6:30 khan COVID Pneumonia avangin ZMC-ah a boral. May ni 3 khan hri a kai tih hriatchhuah niin hemi ni vek hian ZMC ICU ah dah luh nghal a ni.

Vanduaithlak takin Pu Bawihluta (82), Thakthing Veng chu COVID19 pneumonia avangin vawiin (09.05.21) chawhnu dar 1 khan ZMC-ah a boral. COVID19 hri a kai tih hmuhchhuah a nih hnuah ZMC-ah 24.04.21  khan dah luh a ni a, 26.04.21 atangin ICU ah enkawl a ni.

Vawiin khan, tlai lam dar nga thleng khan COVID19 vei enkawlna hmun atangin mi 81 an chhuak.

hri vei chhuakte hi Aizawl-62, Lawngtlai-13, Kolasib-2, Serchhip-2, Mamit-1 leh Saitual-1 te an ni.

Tun dinhmun-ah Mizoram a hri vei hmuhchhuah tawh zawng zawng hi mi 7623 niin, dam tawh hi mi 5755  an ni a, enkawl lai mi 1847 awmin, nunna chan hi mi 21 an ni thung.

Hri vei hmuhchhuah tawh zing-ah hian Mipa 5062 niin, Hmeichhia hi 2561 an ni.

Aizawl district-ah hri vei enkawl lai tam berin mi 1265 an ni a, Serchhip-ah 165, Kolasib district-ah 100, Lunglei district -ah 94, Lawngtlai district-ah 49,  Mamit-ah 55,   Siaha-ah 61, Saitual-ah 30,  Khawzawl 19, leh Champhai-ah 9   te an awm a ni.

Hnahthial district chu hri vei awm lohna district an ni rih!