Aizawl | May 6, 2021: Mizorama Covid19 hri kai an hluarna ber Aizawlah, damlo dahna tur ngaihtuah belh zel a ni a,
Nimin khan Health Minister Dr.R.Lalthangliana hovin Covid veite enkawlna tur atan, MINECO a Mizoram Rural Bank, Head office sak thar chu en a ni a,
Health Minister chuan nasa takin tun hnaiah Covid hri kai an pun chhoh tak avangin a vei te dahna tur a buaithlak tan tih a sawi a, Mizoramah Aizawl khawpui chu a hluarna ber anih avangin CCC emaw CCCC dap mek zel a nih thu leh Medical Team thlengin ngaihtuah belh zel a ngaih thu a sawi a, Damlo na zual bik tan Oxygen leh Ventilator pek an ni tih a sawi a ni.
Health Minister chuan tunah hian Kohhran hruaitu MKHC-te nen pawh an indawr mek zel tih sawiin, positive ngaihtuahawm lo deuh te dah na tur pawh remchang an ngaihtuahpui dawn niin a sawi bawk.
Dr Lalthangliana chuan Covid do kawngah nikum aiin nasa taka tan lak a ngai tih a sawi a. A tul tawpkhawk loah chuan tumah zin chhuak lova, ram pawnah phei chuan zin rih loh tur a ni a ti a. Tunah hian Kanhmun, Vairengte, Myanmar nena inrina hrang hrang, Manipur ramri thlengin theihtawp chhuahin ven hna uluk taka kalpui a nih thu pawh sawiin, Police leh Task Force-te hmalakna pawh chhuanawm a tih thu a sawi bawk a ni.
Nimin vek khan Health Minister hovin Secretariat Conference Hall-ah Physician Doctor-te Covid damlote enkawl dan tur chungchangah an inrawnkhawm a. Meeting-ah hian Chief Secretary, Health Special Secretary, Health Department Official-te leh ZMC lam hotute an tel a. Covid vei damlote an enkawl dan sawiho a ni a, Doctor-te chuan damlo dinhmun azira damdawi an pek dan hrang hrangte an sawi a, a tlangpuiin natna langchhuak - khawsik leh zunthlum leh thisen sangte chu tunah hian ZMC lamah an la tlangpui a. Civil Hospital leh Non Government Hospital thuneitute pawhin damlo an admit dawnin RAgT Test an neih vek thu te, a awmpuitute pawh an test vek thu an sawi a ni.
- AIR Aizawl
Post a Comment
He post chungchanga i ngaihdan lo sawi ve rawh: