BUNGRAW PHUR DRIVER LEH HANDYMAN TE TEST LEH THEI DINHMUNAH KAN DING EM?


2020 kum lai hawl Covid-19 hlauhawm hle ni a kan hriat vanglai khan, Vairengte a driver leh handyman rawn lut kawng chhia avanga Sethawn a tang khawm te chu Random test neih sak an ni. An zinga 30 chuang zet chu an lo positive reng mai a, Nursing Home Thingdawl-ah dah an ni. Hel na lam chi an huai hawt a, video an tidarh a, Mizoram-ah bungraw phurhluh tawh loh tur, an ti a. Thuneitute an buai hle a nih kha. 



 Mizoram luhna hmun a Screening point ah RAgT kalpui a ni zui ta a. Positive apiang CCC Thingdawl-ah dah an ni zel bawk a. Chaw a free a pek an ni a, heng an chaw man pawisa te hi chaw supply tute hnenah Mizoram sawrkar-in ba ta teuh a nih kha.


 Screening Point a hnar an hawlh thin chu Driver leh handyman ten an ning hle a, hnar hawlh duh lo nawrh te a awm chho bawk. He mai hi a la ni ta lo a, Screening Point a tlem avangin Traffic a jam nasa hle. Lailapur leh Vairengte inkarah karkhat te an din an ngai ta a, a hrin chhuah chu buaina hlir a ni mai. Mizoram sawrkar-in Screening Point a Mizoram mamawh phurlut tur driver leh handyman RAgT Screening point an tihsak thin chu tihtawp a ni ta nge nge a ni. Driver leh handyman te hi RAgT hi a free vek a tihsak an ni a, a free a in hawlh pawh hi an duh lo hle.
 Tunhnaiah Driver leh handyman rawn lut test an nih loh chuangchang hi sawi a ni leh ta zauh zauh a, Check gate duty inthlahdah avang ni a sawi te pawh an awm, screening point-ah hian Driver leh handyman te test an ni lo hrim hrim tawh zawk a ni. Thermal Screening (Kan Covid dan tum nana kan hmanraw neih hmasakber khawsik enna kha) tih tumna a awm a, awmzia a neih dawn loh avangin heihi erawh chu tih a ni ta chuang lo. 
 Screening Point a bik takin Vairengteah hian Driver leh handyman te hi RAgT tihsak leh thut theih pawh ani tawh lo a, screening point hi pahnih tal siambelh a ngai ang. A nih loh chuan Traffic jam avangin kan bungraw kawng kan hnawh ping leh ti tih thei hialin a rinawm. Hetihlai hian SCreening Point a Lab Technician te khu an work load a sang sa em em a, Mizoram a sawrkar hnathawk zingah duty ngawrh ber an nih loh pawhin a pahnihna an ni hauh lovang. Lab Tech pakhat khuan an bawm te reuhteah khu darkar 12 duty nan an chang tawp a, an tih fuh deuh phei chuan test an ngah thei hem hem hle. 
 Lab Tech chu lakbelh mai se, kan ti maithei, tunhnaiah Lab Technician pathum lakbelh tum a ni a, Vairengte Screening point a thawk tur Lab Tech an hmu zo lo. A chhan a awm. Hna nghet lo em em mai thawk hram hram Lab Tech te khuan hlawh lamah duhsakna an dawng hranpa lo a, an hlawh lah chu regular takin a hmu regular lo bawk. Positive te kar a khawsa Lab Tech te khuan Facility an nei tha lo bawk a, Meeting nikhua chuan hmui hmang chuan duat an hlawh viau thung. 
 Hetiang hi kan dinhmun a nih avangin Driver leh handyman te hi test ni leh rawhse.. Han tih bulh hmuk hi a awlsam rualin, a tak ramah chuan rin aiin a khirh khan. Hetihrual hian Driver leh handyman diktak karah a lem hi an awm ve leh thin bawk a. Driver leh handyman bakah hetiang ho laka kan fimkhur hle loh chuan .. Contact Tracing kan ti chho deuh reng ang tih erawh a chiang a ni.

Post a Comment

0 Comments