BREAKING NEWS: Tlabung-ah hripui vei in chhawng aṭanga zuangthla-in boral

Aizawl | May 5, 2021: Hripui vei enkawl lai PC Laldingliana chu  Tourist Lodge building thar CCC chung aṭanga zuangthlain zanin dar.7:30 khan a boral.



COVID-19 positive vanga Tlabung Tourist Lodge building CCC a enkawl lai mek PC Laldingliana kum 38 a upa, PC Lalthanzuala fapa, Tlabung vengchhaka cheng mek chu a awmna building chhawng bung ber tukverh aṭanga zuangthlain zanin dar.7:30 khan a boral.


Tlabung Civil Hospitala Medical Officer Dr Lalthanpuian zawhna a chhan danin,  PC Laldingliana,  PC Lalthanzuala fapa hi May ni 2, Pathianni khan Covid 19 a positive tih hmuhchhuah a nih avangin,  Tlabung Tourist Lodge New Building CCC chhawng chung bera Room pakhatah midang pahnih nen dah luh a ni a.  A ni hian Covid 19 symptom a nei lo  niin Zonet JB news chuan a tarlang.

CCC a awmten an sawi danin,  Dingliana hi nizan atang khan buaina a nei tan a. Nizan lamah a awmpui mi pahnihte hian an buaipui niin an sawi a.   Zu in mi  a nih avangin a zu nghei a buai deuh nia sawi a ni bawk. 

Vawiin lamah Dingliana hi buai zual deuhin,  Tlai lam dar 4:45 velah khan tukverhah lawnin zuanthlak a tum lai a awmpuite hian a kutah an man hman niin kan thudawnna chuan a sawi a, hun engemaw chen an chelhbeh hnuah Dingliana hi a tal pit a,  a tla ta niin kan thudawnna chuan a sawi. 

Tlabung Doctorte chuan Dingliana hian a lu a vua niin an sawi a.  A mit ding lam hnuaiah kakin,  thi a chhuah bakah a hnar leh a ka atangin thi tlem a chhuak tih an sawi bawk. 

A mah hi medical team ten buaipui nghalin,  Khumah an muttir laiin,  ka sa emai tiin chhuatah mut a dil a.  An mut tir hnuah a tal buai zui a. Medical team ten theihtawp an chhuah laiin zanin dar 7:30 khan a boral ta a ni.  
Laldingliana hi Tlabung Mutia Association ah Vice President ni lai a ni.

- ZONET JB News

Post a Comment

He post chungchanga i ngaihdan lo sawi ve rawh:

Previous Post Next Post