Aizawl | April 17, 2021: Nimin chawhma dar 11:30 khan ZORO General Headquarters chuan Mizoram Chief Minister Pu Zoramthanga chu a office ah hmuh a ni a, Myanmar ramin harsatna lian tak a tawh avanga kan unaute sahimna zawng a Mizoram lo lut te chhawmdawl dan tur chungchang leh ZORO hmalakna hrang hrang te sawipui a ni.
ZORO chuan Chief Minister leh a thawhpuite hmalak dan ah lawmthu a sawi a,tun dinhmuna kan unaute Mizoram ah mahni sahimna zawngin thahnem tak an lo tlan lut tawh a, lo la luh tum pawh thahnem tak an la awm thu te, kan unaute sahimna zawng a Mizoram lo bel tute thlamuang taka an awm theih nan te, ei leh in, riahna tur thleng a an baihvai lutuk loh nan tih tur awm apiang leh a theih dan ang anga lo tanpui turin Chief Minister hi ngen a ni a. Tin, Central sorkar lamin refugee status a pek theih nana chak taka hma min laksak turin kan ngen nghal bawk a ni. ZORO ngenna hi Chief Minister chuan Myanmar atanga kan unau lo lut te hi kan hre reng a, Mizoram Sorkar pawhin a theih ang anga an lo puih thu a sawi a. Central sorkar pawh an nawr reng thu sawiin foreign ministry lama an nawr nasat thu te, Central sorkar pawh an nem viau tawh thu te, Mizoram lo bel te chu thlamuang taka awm tura a duh thu te ZORO hruaitute hi a lo hrilh a ni.
Chief Minister hnenah hian ZORO hruaitute chuan ZORO chu khawvel hmun hrang hranga awm Zofate kan insuihkhawm a, kan inpumkhat theih nan leh rorelna pakhat hnuaia kan awm theih nana bei tute kan ni a. Kan unau Myanmar a mi ten harsatna an tawh chuan an tan kan din zel dawn thu thlen a ni bawk a ni.
Post a Comment
He post chungchanga i ngaihdan lo sawi ve rawh: