Riverine Reserved Forest(RRF) ṭhiah tak court sang zawka beih let duhtute'n petition buatsaih

Aizawl | April 29, 2021: Save Nature Mizoram intite chuan Mizoram-a Luite humhalh a nih zel theih nan, Gauhati High Court-in Riverine Reserved Forest (RRF) a thiah tak chu court sang zawka beihlet a nih theih nan petition an buatsaih.


He an petition-ah hian mi tu mai pawh hming ziak turin an sawm a, Mizoram lui hrang hrang kang chat mekte humhalh a, venhim a, enkawl that a nih theih nana theihtawp chhuahpui turin an ngen bawk a ni.

An petition-ah chuan a hnuaia mi ang hian an tarlang:
Mizoram Luipui 16 kam ramngaw, lui aṭanga 800 meter hi Riverine Reserved Forest (RRF) area zinga pakhat a ni a, Forest humhalh ram a ni a, mi tumah tan ram neih phal a ni lo a, hmasawnna hna pawh thawh phal a ni lo. Amaherawhchu, heng Lui 16 leh a kam tuak Meter 800 humhalhna dan RRF Notification January ni 28, 1965-a chhuah chu Gauhati High Court, Aizawl Bench chuan kum 50 hnu lam daihah, January 27, 2021 khan a lo ṭhiat ta a. He case hi Tuirial HEP Compensation claim-na kalchho zel a ni bawk.
Mizoram Assembly Budget Session-ah Lawngtlai 'W' bialtu MLA Pu Ngunlianchunga chuan he High Court Order hi Mizoram sawrkarin appeal a tum leh tum loh thu zawhna chhangin P&E Minister Pu R.Lalzirliana chuan, High Court Order hi appeal tumna a awm loh thu leh ram neitu te hnenah Compensation pe turin hma an lak mek thuin a chhang ta daih a!

Tuirial HEP chungchangah hian MNF Ministry hmasa ah khan Lalchhungkua ten Compensation an lo hui vak tawh a, tunah pawh hian he mi chungchangah hian Mizoram sawrkar chuan a pung (interest) te nen Cheng Nuai 3000 chuang fe a senral a ngai leh dawn nia sawi a ni. Kan sawrkar chak tak hian Cheng Nuai 3000 chuang fe hi khawia mi nge a pek tak ang le? 

Mizoram sawrkar hian tinge appeal a tum loh? Manṭang eitu tur thiltithei tak te an inrawlh em ni? High Court order ngun taka chhiar khan compensation pek leh pek loh thu chu Mizoram sawrkar kutah zalenna a pe niin a lang a, pe ngei ngei turin Direction khauh tak a pe lo niin a lang. Hetih lai hian High Court order hi challenge/appeal pawh tum lova compensation pek dan tur an buaipui daih mai hi enge a chhan ni ta ber ang.

Mizoram sawrkar hian heng luipui 16 kam, ramngaw zau tak hi mi thil tithei fa te hnenah a phalrai mai dawn em ni? Kum rei tak humhalh a ni chung leh Mipui ta a ni chung khan mi thiltithei fa te chuan RRF huam chhungah hian LSC, PP, Garden LSC, etc., an lo nei ṭhup thei tho a ni. Kan Luipui te a kangchat mek lai leh kan ramngaw neihchhun te a chereu mek laia RRF Notification ṭhiahna/paihna Gauhati High Court Order Mizoram sawrkarin appeal a tum miah hi a pawi hle.

Mizoram sawrkar hian Gauhati High Court order a appeal loha he Luipui kam humhalhna dan hi paihbo hlen a nih chuan he luipui kam ram ngaw zau tak hi mi thiltithei fa ten an insem darh zo dawn tihna a ni a, mi nawlpui tan chuan neih ve phak a ni dawn si lo a.. Kan ramngaw zau tak kan chan duai duai mai dawn tihna a ni. Hlawkna hmuhna turah chuan kan Lui tui te lo kangchatin kan ramngaw te lo chereu zel mahse pawitihna an nei lo niin a lang.

Ngunthluk taka ngaihtuah hian MNF Ministry-in he Gauhati High Court Order appeal a tum loh chhan hi Vantlang tana thilṭha (Public Interest) ngaihtuah aia mi thiltithei ṭhenkhat ten hlawkna an lo tel theihna (Private Interest) kawng a zawn zawk vang em tih hi ngaihtuah tham a ni. 

High court thutlukna leh Mizoram sorkar in beih let tumna a nei lo hi thil pawi tak a ni a, kan lui bul ramngaw te khauh zawka humhalh a tul zia chu kan hun tawn mek atang hian a chiang leh zual a ni. Chuvangin he thil hi court sang zawkah beih let tum a ni a, kan thil tumte min thlawp zia lantir nan he online signature campaign ah hian rawn sign ve turin kan ngen che a ni.

Post a Comment

0 Comments