NINEVI KHAW MIPUI LEH MIZOTE

- Rev Lalhmingchhuanga Zongte

Ninevi khua kha tihboral vek tlâk khawpa sual an ni a. Vaukhânna thu sawi tûrin Pathianin Jona a tîr hial a nih kha. Nimahsela eng chiah nge an sualna chu sawi lan a ni mang lo. An nunzia leh sûkthlêk kan Bible-in a sawi lan chhun chu, "... an ding leh vei pawh thliar thei lote..." tih kha a ni. Hei hi a râpthlâk tak zet a. An sualna râpthlâk dang dang sawi kûr luai ngai lovin a fiah tâwk hle bawk a ni.

Hmasâng hun aṭangin dinglam hi a dik lam leh ṭha lam entîrna a ni a, vei lam hi a dik lo lam leh chhe lam entîr nân hman a ni ṭhîn. Kan Bible-ah pawh chutiang chuan hmun tam takah hman a ni. Ninevi khaw mipuite chuan an ding leh vei an thliar thei lo a nih chu. Dik leh dik lo, ni leh ni lo, ṭha leh ṭha lo, mawi leh mawi lo an tehna (an value system) kha a tlu sawp vek tawh tihna a ni. Chu tehna ber chu a tlâk chhiat tawh chuan nun dân dikin a nun theih tawh lo va, nun dân dik lo pawisakna pawh a awm tawh hek lo. A râpthlâk tak zet a ni.

Tûnlaia kan Zoram politics han thlîr hian, Ninevi khaw mite kha kan ang hle a; thil dik lo pawisakna a tlêm tawh hle tih a hmuh theih. Khawvêl hmun danga mite (ṭha bîk chuang loten) a rûka thil ṭha lo an tih ṭhin ang kha mipui hmaah, mahni bûk tihrih nân chhuang takin kan tlângaupui ngam ta a ni.

Hei hi ngun taka ngaihtuah chuan lungngaia indawm kun tlawk tlawkna tham a ni. A chhan chu hei hi sual vâng hrim hrim ai mahin, a dik lo va, a ṭha lo va, a zahthlâk a, a pawi a ni tih hriat loh vâng a ni thei ang (a rûka tih pawh ni lova, chhuang taka tlângaupui a nih dânah hian). Chuti a nih chuan a dik lo tih hriat theihna (chhia leh ṭha hriatna) kan tih te, ṭha leh ṭha lo thliar theihna (value system) te kha keimahniah hian awmze neia hna thawk theiin a awm tawh lo tihna emaw a ni dâwn a. Rilru lama piansualna râpthlâk tak nei, mi vânduai leh hlauhawm, sociopath leh psychopath an tihte, tual an thah pawha inthiam lohna nei thei tawh lo ang chi kha kan kawl nual ta tihna em ni ang le?

Lalpa kan ram tidam leh rawh.