Mahni inphata mi ṭanpuitu CT-i

- Lalhruaitluanga Chawngte


Mahni inphatin mi a ṭanpui a, chu chu thil ropui a ni. Chutiang chu hmasang aṭanga khawvel ngaihsan leh dah san a ni.

A mi ṭanpui chu an chhung te emaw an lamhnai te emaw a ni lo a, a piang ve tih pawh a hriat chawp, a hma zawng kha chuan a piang ve tih a hriat ngai loh mi a ni. A ṭanpui dan pawh, nileng zankhuaa awmchilha puih a ngaih dan ang anga pui tura inring reng awm a ngai; ralvengtu ang maia inrin reng a ngai a, hun pum seng turin a inpe tawp. Chu chu ziah tham a ni.



A mi ṭanpui chu Covid-19 natna vei a ni a, khawvelin mi dang hi hri kai anga ngai tur leh hnaih lo tura min zirtir laiin ani chu hri kai bula awm turin, a bana kai turin, mask te vuahtir tur leh a bana kai tur tein a inpe. Chu chu ziah tham a ni.

A mi ṭanpui chu raltlan a ni a, a sahimna zawnga an khua aṭanga tlanchhia a ni. Tunlai khawvelah raltlan chungchang hi khawvel news lian a tling kum tluan a, mi tlemte pawh ni se, an sahimna zawnga tlanchhia an awmin khawvel lehlam chanchinbu-ah pawh an lang ṭhin. Chuvangin, hri kai miah lo pawh ni se, an chhungte pawh lo ni se, eitur pe zuaia hawsan leh daih pawh lo ni se, raltlan a ṭanpui thu hi thuthar lakhawmtute tan ngaihven tham, ziah tham a ni.

Amah chu CT Ramnunmawii a ni a, a mi hriat ngai loh, covid-19 natna vei, raltlan a awmchilh a, a ṭhutchilh a, a riahchilh mek. A chanchin ka sawi thiam dan ber chu- Mizo nula a ni tih hi a ni mai e.

Doctor te'n 'Hri i kai phah thei asin,' an tiha a chhanna chu 'Ka hria alawm,' tih a ni. Pitar, kum 93 mi, mahni ina cheng ngam lova harsa taka tlanchhia, a tlanchhiatna lama vanduai asiama hri kai ta, puih ngai tak mai chu a kalsan thei lo a, hming te inhrilh chawpin an inawmpui ta a ni.

Amah Pu Rokunga hla pakhat ka rilru-ah a lo lang a, "Mizo kan ni kan hmel a ṭha, kan tum a sang bawk si," tih kha. He hla hi a hriatsual palh theih hle ni te'n ka hria a, "Kan tum a sang bawk si," han tih hian, lal deuh nih kan tum e, hna sang thawh tum tlat hnam kan ni e tihna emaw tia lo titipui ve chiam te pawh a awm theihin ka hria. A tlar hma lam kan en chuan "Kan pi kan pu mi huaite dan ṭha kha mawi kan ti," tih kan hmu a, chumi zawmtu chu "Țhian chhan thih an ngam fo ṭhin," tih a ni. Chu chu "Keini'n chu dan chu zawmin huai taka din kan tum," tihin a zawm leh a, chuta "kan tum" a tih chu sang tak a ni! Chutiang khawpa sang chu tum tura infuih ṭhin hnam chu kan ni a, "Kan tum a sang bawk si," a tih loh theih loh. 'Kan ambitious e, kan ambition a sang lutuk,' tihna a ni lo a, eizawnna nuam leh hahdam, hlawh tam si, lal deuh nih theihna inkawhhmuhna lam a ni lo. CT-i te thil tih ang chi, mahni inphata thian chhan tumna sawina zawk hi a ni e. Chutiang sang ti lo a awm theih dawn em ni?

Kei hi chuan he hnam hmel hi ṭha ka la ti reng a, min hnial an awm a nih chuan CT Ramnunmawii chanchin hi ka hrilh ang.

Amah CT-i lah chuan, "Eng nge thil awmzia? Eng nge a ropui vakna? Mihringin a mihringpui chunga a tih tur thil pangngai a ni mai lo'm ni?" a ti ang he haw a!

Post a Comment

1 Comments

  1. Ka tih theih/ngam loh tur a ni. Lalpa'n a lèt tamtakin malsawm mawlh rawh se...

    ReplyDelete

He post chungchanga i ngaihdan lo sawi ve rawh: