Inthlan duty hruaitu IR driver boral

Aizawl | April 27, 2021: Assam leh West Bengal inthlan a duty 4th IR police te hruaitu 1st IR driver PC Lalawmpuia (48) chu tukin dar 3:15 khan an quarantine-na tur Rengdil-ah a boral a, tukin vek khan an khua Kawnpui panpui a ni.

4th IR Bn. hotute hnen aṭanga thudawn danin Lalawmpuia hi driver dangin motor an khalh chhawk laia a lo muhil chu, tukin dar 3:15 a Rengdil an thlenin an kaitho zo ta lova. Covid test nghal a ni a, a negative a, thisen sang a nei niin an sawi.

Rengdil North branch YMA ten kuang an tum sak a, puanin an tuam bawk a, an lawm takzet tih 4th IR Commandant Lallianmawia'n a sawi.

"Rengdil North branch YMA te hian kuang man an la duh lova, ruang hnaihin buaipui thei lo mahse, an tih theih chin zawng zawngah theihtawp an chhuah a ni" a ti.

Rengdil VLTF chairman TC Lalthantluanga pawhin 4th IR Commandant Lallianmawia'n VLTF te Rs. 2000-a a puih thu sawiin lawmthu a sawi ve bawk.

Assam leh West Bengal inthlana duty 4th IR police, tukina Rengdila thleng te hi mi  86 leh anmahni hruaitu driver 7 an ni tih an hotu ten an sawi a. Vawiinah hri an kai leh kai loh test a ni anga, ni 10 khunghran an nih hnuah test leh tur an ni tih an sawi bawk.

-Zozam Times.


Post a Comment

0 Comments