Inkhap hranpa ngai lova chhuak lo tura mipui kan zirtir hi hrileng dona kawnga hmanraw pawimawh tak a ni a, mahni inthunun theia mipuite chhuak lo tura kan siam hi changkanna kawng pakhat a ni - Kolasib DC

Aizawl | April 28, 2021: Vawiin khan DC Conference Hall, Kolasibah Turial, Serlui leh Kolasib Assembly constituency chhunga VLTF hruaitute hnena Covid-19 inkaihhruaina SOP inzirtirna hun hman a ni a. Dr.H.Lalthlangliana, Deputy Commissioner chuan he hun hi kaihruaiin  Dr Lalhlimpuia, Chief Medical Officer, Pu Vanlalfaka Ralte, SP, Pu Benjamin Lalzama, Project Director, DRDA leh SDO(Civil) Kawnpui leh Vairengte an tel bawk a ni.
Hun kaihruaitu Dr.H.Lalthlangliana, Deputy Commissioner chuan Covid-19 hrileng dona kawngah Kolasib district-a khawtlang hruaitute leh sawrkara thu neituten thawhhona tha tak an lo nei thin tawhnaah lawmthu a sawi a, Covid-19 hrileng thawh hnihna thleng mek dona kawngah pawh pheikhai rual taka thawhhopuiah sawmin sawt zawka hmalak a nih theih nan Sawrkarin inkaihhruaina thupek a chhuahte zirchianna neih a tul thu a sawi.




Deputy Commissioner chuan khapna dan chhuah ngai lovin khawtlang mipuite chu tul lova chhuak lo tura zirtir tam a pawimawh thu a sawi a,” Inkhap hranpa ngai lova chhuak lo tura mipui kan zirtir hi hrileng dona kawnga hmanraw pawimawh tak a ni a, mahni inthunun theia mipuite chhuak lo tura kan siam hi changkanna kawng pakhat a ni”, a ti. Mi tupawh inringhleh, Covid-19 test tir duh an awm a nih chuan VLTF kaltlangin Contact Tracing team-te hriattir tur a nih thu leh Contact Tracing team-ten endikna turin ruahmanna an siam thin tur thu DC chuan a sawi. Test tura sample lak tawh, result nghak mek te chu an result hriatchian a nih hma chuan VLTF-te enpuina hnuaiah inkhunghran tir tur an nih thute, chhan mimul tak awm lova mikhual, state pawn atanga lo kal ni lo, khung hran chu dan phal a nih loh thute sawi lan a ni bawk. Dr.H.Lalthlangliana chuan Covid-19 do nana sawrkar thuchhuak kan bawhzuina kawngah mipui nawlpui khawsak tibuai lo zawnga hmalakna kalpui thin turin VLTF kalkhawmte chu a chah a,” Mirethei ber leh harsa berte dinhmun ngaihtuah chungin ruahmanna siam tum ila, mipui kan dawrna kawngah dawhtheina nen hawihhawm leh zahawm takin kan hna hlenchhuah kan tum thin tur a ni,” a ti bawk.
Vawiin thutkhawmnaah hian Covid-19 hnuchhui kawnga VLTF-te zawm tur te, mikhual lut leh chhuak chhinchhiah chungchangte, inkhunghranna kalpui dan tur chungchangte ngun taka sawiho a ni a. Dr.Lalhlimpuia, Chief Medical Officer atangin vaccine lak pawimawhzia leh natna benvawn neite chuan vaccine lak an ngaihpawimawh zual a tul thu ngaihthlak a ni a. Pu Vanlalfaka Ralte, SP, Kolasib pawhin ramri screening point hrang hranga police duty dante sawiin khawtlang mipui leh VLTF-te tawiawmna thinah lawmthu a sawi bawk a ni.
State thenawm nena inkalpawhna Vairengte Screening point bakah hian Saiphai leh Phaisenah te Screening point siam a ni bawk a. Saiphai hi kar khatah Thawhlehni leh Zirtawpni, chawhma dar 8 atanga tlai dar 4 thleng hawn thin niin Phaisen hi Chawlhni tiam lovin chawhma dar 10 atanga tlai dar 6 thleng hawn thin a ni bawk a ni.
Covid-19 chungchanga thu belhchiandawl lo thehdarh a nih loh nan bialtu Zonal Executive Magistrate theuhte leh VLTF hruaitute chu thawhhona tha neih a tul thu sawi a ni a. Hetiang thu thehdarhtute chu rang taka dap chhuah an nih thin thu leh hremna pek an nih thin thute tarlan a ni bawk a.

Post a Comment

0 Comments