Hripui vangin Sihphir khua buai mek; Khawchung mi lirtheia veivah pawh khap!

Aizawl | April 27, 2021: Sihphir venghlun chu nimin leh vawiina hripui vei an hmuhchhuah avangin an buai hle a, Sihphir Venghlun VLTF-in mipui pawn chhuah leh lirthei a veivah pawh a khap a, nimin atang khan dawr zawng zawng pawh khar vek a ni bawk.


Sihphir Kiosk (UPHC) a Covid 19 test neihah Sihphir Venghlun a cheng mi 10 zet RAgT atangin Covid 19 positive hmuhchhuah anih avangin nimin tlai dar 5 pelh hnu atang khan mi tu pawh pawn chhuah khap a ni a,  lirthei (Auto rickshaw, taxi, etc) veivah pawh khap nghal vek nin, dawr zawng zawng pawh khar nghal vek turin VLTF chuan thuchhuah an siam!

Positive zingah hian nimin a  Sihphir Community Hall a vaccine la an awm avangin nimin a vaccine la zawng zawng te pawh pawn lo chhuak lo turin Sihphir VLTF chuan a hriattir bawk.


Tin, Vawiin khan Sihphir Venghlun YMA Hall-ah  insawiselna nei te Covid Test neih a ni in, vanduaithlak takin Covid 19 Positve mi 5 an hmuhchhuah belh a, an ni hi hripui vei te lo hnimhnai tawhtu an ni.

He tiang hi kan khawtlang dinhmun a lo nih leh tak avangin, inkhuahkhirhna nimin lama an lo chhuah tawh sa chu kalpui chhun zawm phawt zel turin hriattirna an chhuah.

Sihphir Venghlun Village Level Task Force Information secretary leg YMA Sihphir venghlun branch secretary ni bawk Robert Lalhmachhuana hnen atanga EXPLOREMIZORAM.COM in thu a dawn danin, Sihphir khua-ah hian Hripui vei hi nimin leh vawiina hmuhchhuah a vaiin mi 15 an awm mek a. Lirthei a veivah pawh an khap-ah hian khualzin, khual khua tlan tlang turte chu a huam loh thu a sawi.

Sample test an kalpui dan tur zawhna chu, "health lam hotute hian hri lanchhuah theih hun tur min nghah tir tawh ka ring deuh" tiin a ngaihdan a sawi.

Tun dinhmunah chuan chakkhai leh ni tin mamawhah buaina an la tawk rih lo nia thu dawn a ni a, mahse, hri lengin a tihbuai reng a, mipui him zawk nana an inkharkhip reng chuan chakkhai leh ni tin mamawhah ni tin ei chawp zawnga intung nung chhungkaw tam takin buaina nasa tak an tawk thei dawn niin a lang.


Sihphir khua hi Census 2011 in a tarlan danin, In 1349 awmin, mihring 6528 chenna khua a ni. Aizawl atanga Km 10 vela hla hmar lama awm a ni.

Post a Comment

1 Comments

He post chungchanga i ngaihdan lo sawi ve rawh: