FEATURE STORY: Hripuiin a hneh loh Nula CT Ramnunmawii; Hripui a hneh hnuah hri vei pitar enkawl turin a inpe leh!



Aizawl | April 21, 2021: Champhai Ruantlang nula CT Ramnunmawii, Hripui a hneh hnua hri vei pitar awmpui a, enkawl tura a inpe leh chuan mi thinlung a hneh hle a, ngaisangtu leh ngainatu a ngah a, tawngtaisaktu pawh an tam hle  a ni.


Champhai Ruantlang Nula CT Ramnunmawii, Delhi atanga rawn haw chu COVID-19 a positive avangin BSUP Durtlang ah dah luh a ni a, mahse reilo te ah a dam leh ta mai a, enkawlna hmun chhuahsan mai theiin a awm tawh a.  April 20, Thawhlehni kha a sample test leh hun tur a ni a, a negative chuan chhuak tawh turah a inngai. Nghakhlel taka lo thlirtu a chhungte hnen thlen ngei pawh a chak tawh ngei ang!


Mahse, chutia hri vei enkawlna hmun chhuahsan mai thei dinhmuna a awm lai chuan pitar kum 93 mi COVID-19 positive awmpuitu tur remchang lo a awm tih a hria a. Chu pitar lainatawm chu amah a awm tir chi nia a hriat loh avangin amah thlalhlel em emtu a chhungte pawh thlahlel zo lovin chu pitar awmpui tur chuan a inpe ta a ni.

Pitar enkawl a, awmpui chu a dil ta a, doctor leh thuneituten awmpui an phalsak a, tunah hian a awmpui mek a ni.

April 19 zan khan SRH-ZMC-ah sawn phei an ni a, a sample pawh test nawn a ni ta rih lo.




Thlalak a kan hmuh ang hian he nula hian pitar hi Bible te a chhiar sak a, a thil tih hi a van mawiin hmuh a van nuam em!

EXPLOREMIZORAM.COM zawhna chhangin CT-i chuan, "amah a tar ve tawh nen khan ka inpe ve deuh tawp," tiin enkawl tura a inpek chhan a sawi.

"Enkawltu nei lo tia thuthang hi a dik  reng em?" tia EXPLOREMIZORAM.COM  zawhna chu, "kha chu a dikna chen a awm rualin enkawltu nei lo tih tawp kha chu dik lo deuh ka ti" a ti a, "enkawltu tur chu a nei a, mahse, an quarantine vek avangin tuman an lo zui thei lo kha nia." tiin enkawltu turte an quarantine zawk vanga enkawl tura remchang lo an nih thu a sawi bawk.

"April 6, 2021 khan Delhi atangin ka lo haw a, Lengpui Airport leh ZMC a test negative hnuah symptoms neiin April 10-ah ka positive tih an hmu a, enkawlna ka dawng a. April 19 tlai-ah khan Ka pi hi enkawlna hmun-ah an rawn dah a, hemi tlai hian a chanchin ka hriatin an roomah ka kal nghal a, amah a lo tar ve tawh nen, BSUP a an rawn dah chhan pawh hrethiam thei loin haw a ngen a. ka lainat em a, amaha awmtir chi a ni lo tih ka hria a, enkawl turin ka inpe ta a ni," tiin CT Ramnunmawii chuan EXPLOREMIZORAM.COM  hnenah pitar lainatawm nena an intawn dan a hrilh.

An dinhmun chungchang zawhna chu, "tunah hian a dinhmun hi a tha tawh a, chhuah vat kan inbeisei." tiin EXPLOREMIZORAM.COM  a hrilh bawk.

An chanchin social media-a a darh hnu hian Instagram lamah pawh follow-tu an pung thut a, phone call leh message pawh a dawng hnem hle a ni. "Ka pi buaipui ngai nen, phone call ka dawng ve nasa sia,.." tiin inthlahrung takin EXPLOREMIZORAM.COM  hnenah an chanchin a hrilh.

COVID-19 a positive a, a dam a, chhuak mai thei a nih hnua mi dang pui tura a inpek chungchanga a chhungte sawiin, "nia... ka chhungte ka be hmasa a, zep loh chuan unau-a naupang ber ka nihnaah Delhi a ka awm pawh kha min ngaihtuahin COVID-19 ka kai ngat  phei kha chu an lo tap hial a," a ti a, "(dam taka ka haw hun) min nghakhlel ve tawh nen ka pi enkawl tura inpek ka tum thu ka han hrilh thut kha an hrilhhai ve hle a, mahse, 'COVID-19 i kai chhan te pawh a lo ni mahna, mi tana inpek duhna thinlung i neih kha Pathian atanga chhuak a ni a. I thu thu in i ti thei' tiin rilru dam takin min thlah a," tiin EXPLOREMIZORAM.COM  a hrilh bawk.

CT Ramnunmawii hi Fam Thangluaia leh Lallawmthangi te fanu niin, an unau pakaw zing naupang ber an ni. CT-i hian kum 25-na hmang mekin, Lloyd Law College, Delhi-ah LLB kum khatna a zir mek a. Champhai Ruantlang a cheng leh khawsa an ni.





Founder/Editor
Explore Mizoram





(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments