Chite luia bawlhhlawh dalna siam enfiah

Aizawl | April 1, 2021: Save Chite Lui Coordination Committee leh Aizawl DC-te tangkawpin Aizawl khawpui bawlhhlawhte Chite Luia a luanluh lohnana dalna an siam chu AMC Executive Councillor Laltlanzova Khiangte, Solid Waste Management changtu hovin  vawiin khan a hmunah en a ni.

Bawlhhlawh dalna hi Theihai Luiin Chite Lui a finna bulah leh Mirawng Luiin Chite Lui a finna bulah te enchhinna atana siam chhin phawt a ni a. A siam dan fuh tawk lo laite thlirho a ni a, tha zawka thuam that zui dan turte pawh sawiho a ni bawk.

He hunah hian Pu Laltlanzova Khiangte chuan thu sawiin, "Changkang leh hmel mawi takin lang thin mah ila, hetiang khawpa tam bawlhhlawh tlingkhawm hi kan hmel dik tak lanna a nih avangin, Aizawl khawpui faina tur atan theihtawp chhuah turin mipuite ka sawm a ni," a ti.

Pu Laltlanzova Khiangte hi AMC Councillor pali - Pu Vanlalneiha, Pu John Zosangliana Ralte, Pi Chuauzikpuii leh Pi Christina Roluahpuii Sailo te’n an tawiawm a. He hunah hian AMC hotu thenkhatte, Aizawl DC office-a hotute leh Save Chite Lui Coordination Committee hruaitute an tel a ni.

- DIPR