Chief Minister-in India@75 hawng

Aizawl | April 1, 2021: India Independence 75-na lo thleng tur lawmna bul tanna ‘Azadi Ka Amrit Mahotsav’, India@75 chu vawiin khan Mizoramah Chief Minister Pu Zoramthanga hovin Vanapa Hall-ah neih a ni.




Chief Minister chuan India zalenna champha phak kum 75 na chu thil lawmawm tak, rampum anga lawmna siam pawh thil tih awm tak a nih thu a sawi a. Zalenna chang tura India ramin a hun paltlang tawh zawng zawng thlir let chuan harsatna tam tak awm mahse, Mahatma Gandhi an a bul tan nan ralthuam leh tharum thawhna tel lovin, 'non-violence' hmanga zalenna a sual kha kan vanneihna a ni, a ti a. Ram danpui ropui tak, zirchian tham siamin, khawvel a democracy ram lian ber kan ni ta zel bawk a. Tunah hian economy lamah a ni emaw, sipai leh ralthuam lama chakna lamah a ni emaw, ramdang mite zirchian leh entawn reng kan ni chho ta zel a; He ram khua leh tui kan nih ang hian state tin a mi te, hnam tin te, tawng hrang hrang hmangte hi midangte zirchian tur awm ang renga kan ngaihtuahna te kan siam a, hma sawn zel kan tum a pawimawh a ni, a ti.
Vawiina Vanapa Hall-a programme, GAD buatsaih hi Chief Secretary Pu Lalnunmawia Chuaungo chuan a kaihruai a. Department of Information & Public Relations buatsaih documentary tawi 'India's 75 years of Independence- India@75' chu thlirho niin, Addl. Chief Secretary Pu JC Ramthanga chuan lawmthu sawiin hun a khar a ni.
Azadi Ka Amrut Mahotsav hi India Independence a hmuh champha phak kum 75-na chhinchhiahna turin a lawmna hrang hrang buatsaih chhohna tur a ni a, kar 75 chhung, August ni 15, 2022 thleng a awh dawn a ni.

- DIPR

Post a Comment

0 Comments