Chamring lei khi sawrkarin en dik; lung pialtlep bul thut pheh vang - Senior Geologist

Aizawl | April 27, 2021: Disaster Management & Rehabilitation Minister Pu Lalchamliana  hmalakna in niminpiah lama Chamring khua a lei khi chat (crack) chungchangah a hmuna enfiah leh zirchiang turin nimin khan DM&R Department, Geology & Mining Department, Public Works Department leh Information & Public Relations Department  aiawh te an kal a, a hmunah hian Aibawk BDO in a lo dawngsawng a ni.



Department hrang hrang aiawh bakah hian Bialtu MLA Dr. F.Lalnunmawia leh midangte pawhin lei kak na hmun hi enfiahin, Department aiawhte nen hian a hmunah zirchianna leh sawihona an nei a, Bialtu MLA hi Mizoram University leh Govt. Zirtiri Science College a Geology Department-a zirtirtu ten an tawiawm bawk a ni.
Senior Geologist Pu P.Sanghnuna chuan lei khi chat lo thlen chhan hi lung pial tlep bul thut pheh (toe cutting of deep slope)vang a ni a ti a, tuna a khik chahna atanga chhaklam metre 40 vela hla-ah a chet tawhna hnu hma anga lang, ruam (depression) a lo awm tawh tih a sawi bawk a. Lei khi kak awmdan hi tui zai (joint) mil in right angle  a ni a. A hnuai lampanga dawmtu pheh a nih takah chuan lei hi a tawlh thla ta a, lung mur hraw leh sin, tlak lung a awm bawk a, feet hnih bawr velah lei (soil) a awm bawk a ni. A kak zau lai ber hi feet 11 a zau a ni a, building sir ah a feet 6 velin a tawlh a ni. Lei che volume hi a tam avangin retaining wall siam aiin, a che chin lei hi paih fai a that zawk a rin thu a sawi bawk a ni.


Senior Geologist Pu P.Sanghnuna leh EE Pu Zirthanmawia Hmar ten mitigation measures ziakin report an siam dawn a ni.


Lei khi circular sling hi metre 84 a ni a. A ram neitu hi Chamring khua Pu Zoramthanga a ni a, lei khi avanga in sak mek chhunga mi pahnih awmte chu zana riaklo tura hrilh an ni bawk a ni.

Post a Comment

0 Comments