ZORO-in Myanmar Zofate thlavang hauhin MHA thuchhuak hal

Aizawl | March 23, 2021: Zo Re-Unificationa Organisation (ZORO) chuan Myanmar zofate chungchanga India sawrkar thuchhuak duh lohna leh dodalna lantirna hun vawiin chhun dar 12 khan Vanapa Hall kawtah an huaihawt a,  dodalna punkhawm-ah hian India sawrkar thuchhuak an hal.


ZORO chuan India sawrkar ministry of home affairs (MHA) in Myanmar buaina avanga zohnahthlak lo lutte thawn haw leh man chhuk tura thu a chhuah chu duh lovin an duh loh zia lantir nan Aizawl Vanapa hall kawtah punkhawm an huaihawt  a. He hunah hian MHA thuchhuah an hal bawk a ni.


India Sawrkarin Myanmar aṭanga Mizorama  kan unaute sahimna zawnga lo lut te, thawn haw a, man chhuak tura an tih Union  Home Ministry thuchhuah hmarchhak  Manipur , Mizoram , Arunachal, Nagaland State Chief Secretary te hnena thawn chu dodalna leh duhlohna lantirna nimin khan Vanapa hall kawt ah neih a ni a, India Union  Home Ministry lehkha chhuah chu  Zo Reunification Organisation(ZORO), General Headquarters, Aizawl hruaitu ten  an hal a ni.


ZORO President  R Sangkawia chuan, kum  1963 leh 1973 vela Bangladesh atanga Chakma leh Bengali raltlante chu  India sorkar in thawn let lovin Refugee  ah a pawm lai a, Burma sipai te mipui sorkar paihthlaa thuneihna an pawnglaklaia zohnahthlak thenkhat Mizorama an sahimna zawnga rawn lutte chu thawn let tura a tih chu a hrethiam lo hle tih a sawi a, Union Home Ministry chu thupek a lo chhuah tawhte sutin Myanmar raltlante Refugee status pe turin a ngen a ni.


ZORO Vice President Pu Rohminga Kawlni pawhin British sorkarin zofate chu ram 3 Bangaladesh,India leh Myanmar ramah a then darh a, tunah Myanmar rama kan unau zofate harsatna an tawh lai a India Sorkarin kan in unauna thenhrang tur ang ziazangin a thil tih hi a pawi hle a ni a ti bawk. Tun hi tanrualna hun a ni a,  chutiang  ni lova kan inthlauhthlak chuan nakin hnu zelah inpumkhatna  a awm thei lovang, a ti.


ZORO thalai  President  L Ramdinliana Renthlei chuan, India Union Home Ministry in thupek duh awm lo tak a tih chhuah chuan Zofate chu India miah min ngai lo tihna a ni a. Tun hi India sorkar dodalna hun tha a ni a ti bawk. A leh lama  zawnga ngaihtuah chuan  a lawmawmna chen pawh a awm a  ni a ti. Mizoram sorkar  leh political party te chuan Myanmar atanga raltlante chungchangah  thuchhuah mai duh tawk loin a takin penchhuak turin ka sawm a ni a ti bawk.


Tichuan kal khawm mipui te chu lungrual takin  Raltlante chu thawnkir kan duh lo tih  thute, Myanmara mipui rorelna a awmleh thuai theih nan India sorkar chuan hma la tur leh khawvel hmun hrang hranga zofate rorelna pakhat hnuaia a awm theih nan ZORO in resolution an pass a ni.
















Post a Comment

0 Comments