Zophai leilet enkawl chhunzawm dan tur rel

Aizawl | March 10, 2021: Zophaia leilet enkawl chhunzawm dan tur relin nimin khan Kolasib Deputy Commissioner Dr.H.Lalthlangliana hovin meeting neih a ni a, SP Kolasib, Zonal Executive Magistrate, Village Council hruaitute, NGO hrang hrang aiawhte leh leilet neitute an tel a ni.

Dr.H.Lalthlangliana kaihruai meetingah hian, Zophaia ramria an ngaih hmun a leilet leh ram neitute chuan harsatna an tawh lohna turin Sawrkar thuchhuak anga tih tur leh tih loh tur duante chu zawm tum tlat a tul a ni a ti a, Zophaia leilet neitute chuan anmahni ngeiin an ram an enkawl thei lova, ramdang mi an chhawr duh a nih pawhin, dan ang thlapin ILP an nei ngei tur a nih thu leh intiamkamna felfai tak an siam ngei tur a nih thu a sawi a. Zophaia buaina thleng thin chu hnamdang enkawl tur a ram nei, intiamkamna mumal awm lo leh a neituten an vilpui ngai loh avanga an mi chhawrten an ta neih tak thin vang nia a lan thu a tarlang bawk a ni.

Pu Lalthlangliana chuan Ramria ngaih, Zophai hmunah hian funkim zawk a hmasawnna hna, Integrated Development Scheme, duan mek a nih thu a sawi a, hemi hi kalpui hlawhtlin anih theih nan Bairabi khua mipuite nena thawhhona tha neih a tul thu a sawi bawk a ni.

He thutkhawmnaah hian Bairabi Joint VC chuan Zophai hmun a leiletahte hian hnam dang mi chhawr an nih loh nan hma an lak mek thu an tarlang a, Central YMA, MZP, MSU leh Bairabi khawtlang hruaitute atangin thusawi ngaihthlak niin Zophai hmun chu mimal emaw, pawl emaw, political party ang emawa hmingthat tum vanga hmalakna awm lo tur a an duh thu an sawi a. Hmasawnna chak zawk a awm theih nan sawrkar hmalakna tithuanawp zawnga chetna awm lo turin leh sawrkar thu ngaihchan thin a pawimawh thu sawi a ni bawk a ni.

Zophai hmunah mi 46-in leilet nei ang a chhinchhiah a ni a, tun thla ral hma hian hemi hmun a leilet nei, kohna dawng ve lote chu President, Village Council, Bairabi North hnen a inhriattir tura ruahman a ni bawk a ni. 

- DIPR