YMA hi Mizo hnam darthlalang, Mizo hnam humhimtu a ni - Lalruatkima

Ngopa | March 26, 2021: I&PR Minister Pu Lalruatkima chuan vawiin khan Tuiphal Group YMA Conference vawi 47-na hmanpuiin YMA chu Mizo hnam darthlalang, Mizo hnam humhimtu leh mi zawng zawng a te ber atanga a lian ber thlenga an thlamuanpui a ni, a ti.

Tuivai Group YMA Conference vawi 47-na Chiahpui Community Hall-a neih a khuallian Pu Lalruatkima chuan Tuiphal Group YMA member te khawmpui chibai bukin duhsakna a hlan a, Tuiphal Group chu Mizoram tihmingthatu mi tam tak lo chawrchhuahna a ni tih sawiin, zirna ngaisang thin Group an nihna chawinung zel tur leh ram leh hnam tana tangkai mithiam tak tak chherchhuak zel tura tan la thar turin a fuih a. Tunhma chuan nu leh pa ten fate an zilhna tawngkamah lehkha i zir loh chuan hna i thawk ang, an ti thin a. Tunah erawh chuan hna thawk thiam turin lehkha i zir tur a ni, tih hi kan sawi dan tur a ni tawh zawk a. Thangtharte thinlunga thiam tura inngaihna leh inrintawkna tuh a tul a, lehkhathiamtheite leh infiamna lama talent nei thate chu nu leh pa mai bakah khawtlang pawhin kan puih a, kan chher hriam a tul a, chhiatni thatni leh thil dangah pawh kan awl hreh tur a ni lova, reiloteah ram leh hnam, khawtlangin kan chhawr tangkai tur an la ni tih hria a, fuih phur thin hi kan tih tur a ni, a ti.

Khuallian chuan YMA hi tlawmngai pawl a ni satliah mai lova, khawtlang nun hruai ngiltu, kan that tlanna tura mi zawng zawng rualkhai taka min kaihruaitu an nih avangin an hlu em em a. Tunhmain thangtharte kaihhruaina leh zonun zemawi zirtirna hmun atan Zawlbuk kan nei thin a, hun lo inher danglam zelah kalphung thlak a ngai a, Zawlbuk chu Young Lushai Association in a thlak a, chu chu tunah Young Mizo Association kan ti ta a. YMA chu zofate thlavang hauhtu, kawng dik zawh tura kaihruaitu a nihna hi kan chhawm nung zel tur a ni, a ti.

Pu Ruatkima chuan COVID-19 hripui leng kara lungthu pathum - Sawrkar, Kohhran leh YMA te thawhhona a ropuizia hi khawvel hriatpui tlak a ni tiin, Mizoramin harsatna kan tawh laia Zoram pawn hmun hrang hranga zohnahthlak unauten 'eitur kan thar chhuah chhung chu riltamin in awm lovang' an rawn ti te kha a ropuiin, zonun zemawi kan induhsakna leh kan inhmangaihna a par chhuak leh a, kan chhawm nun chhunzawm zel a pawimawh a ni tiin, Zoram pawna kan unauten harsatna an tawhin anmahni tanpui turin kan tlanchhe bik tur a ni lo, a ti a. Ram leh hnam chhan kawngah leh hmasawnna hnathawh kawnga sawrkar hmalakna thlawp tlat tur leh tihhhlawhtlinpui tura theihtawp chhuah zel turin a chah bawk a ni.

Tuiphal Group YMA hnuaiah hian Branch 7 - Chiahpui, NE Khawdungsei, Khawkawn, Lamzawl, Ngopa, Ngopa Hmar Veng leh Ngopa Chhim Veng branch te an awm a ni.

Chawhnu lamah rorel inkhawm neih niin Saitual Sub-headquarters YMA hruaitute kaihhruaina hnuaiah Tuiphal Group YMA hruaitu thar thlanna neih a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post