School education minioster-in Hmar tlangdung khuate tlawh

Aizawl | March 22, 2021: School Education Minister Pu Lalchhandama Ralte chuan vawiin khan Tuivawl bial chhung  khaw hrang hrang - Ratu, Lungsum, Damdiai,  New Vervek leh Thingsat te a tlawh a. Khawtlang hruaitu ten mipui mamawh thil hrang hrang an lo thlen te chu ngaithla in a hmunah a enpui a, hna thawh dan tur te a sawipui a ni.

Minister chuan amah lo dawngsawngtu te hnenah khawtlang huapa inhmuak luai luai lova khawtlang hruaitute nen hnathawh tur ena sawiho chu a duhthusam a nih thu a sawi a.  Inthlanpui dawna a au hla, hmar tlang dung tihen nan Zoram kawtchhuah thar siam a ni ang, tia a sawi thin chu tunah hian sial hna thawh mek a ni ta a. Manipur nena inkal pawhna kawngpui Tuivai lui kaltlang chu thawh mek a ni a,  Bhaga nena inkalpawhna tur kawngpui pawh chak taka buaipui mek a ni a, heng kawngpui pahnih hi zawh anih hunah chuan hmar khawthim zangkhaw bungbut hnan hi a eng dawn a ni, a ti.

Hmar tlangdung tihen nan zirna siamthat leh hriselna tih hmasawn pawh a aupui thin thu sawiin Minister chuan tunah hian zirna tih changtlun nan Darlawnah Higher Secondary School, Science zirna leh E.Phailengah Higher Secondary School  Arts stream te hawn a ni bakah, Eklavia Model Residential School pawh din turin inbuatsaih mek a ni a, School awmsa te pawh kawng hrang hrangin thuam that zel a ni a ti.

Pu Lalchhandama chuan hriselna tih hmasawn nan hmar tlang dung khaw tinah clinic centre din a ni a ti a. JJM hnuaiah tui lak dan tur pawh kawng zawn zel a ni tih a sawi bawk.  

Minister-in a bial chhung hmar tlangdung khua te a tlawh kualnaah hian Pu Lalhmachhuana State Project Director Samagra Shiksha te, Pu Lalfakawma Sakawrdai SDO (Civil) te, officer thenkhatte leh Sinlung Hills Council-a EM leh member thenkhat ten an tawiawm a. Khaw hrang hrangah hian khawtlang hruaitute leh tlawmngai pawl hruaituten an lo dawngsawng a ni.

- DIPR