Aizawl | March 17, 2021: NT Lalbiakkima'n professional boxing a khelh vawihnihnaah IBA intercontinental title a chuh dawn a, ngawrh takin inbuatsaihna a kalpui mek.
Marine Pro Boxing Promotion hnuaiah NT Lalbiakkima leh Sandeep Singh an inhmachhawn dawn a, Indian boxer pahnih hian April 17-ah Mumbai-ah weight zang berah intercontinental title an inchuh dawn. He inhnek hi LPS Vision atangin live telecast-a pe chhuak turin inremna siam fel tawh a ni.
Coach Lalmuanpuia hnuaiah Biakkima hian Bawngkawn, Aizawlah zing leh tlaiah inpuahchahna ngawrh takin a nei mek a, professional boxing a khelh vawihnihna tur chauh ni mah se, khawvel pum huap pawhin an khelhna weight-ah boxer an tam lo va, chu bakah a inhnek tawhna video an thawn atangin IBA chuan intercontinental title chuh thei turin phalna an pe tih a sawi.
LPS Pro Fight lightflyweight-a vawi nga a zawna champion thei NT Lalbiakkima hian nikum December 20 khan Mumbai-ah a vawikhat nan Marine Pro Boxing Promotion hnuaiah professional boxing a khel a, round khat hmang tluan lovin technical knockout-in a khingpui Haryana boxer Aman a hneh a ni.
June 2018 khan Biakkima'n India ai awhin Kazakhstan-ah President's Cup a khel a, quarterfinal-ah Olympic champion leh hetih laia world number one ni kawp mek Hasanboy Dusmatov a lo hneh tawh a, hei vang hian mi hriat a hlawh hle a, professional luhchilh tura sawmna a dawn phah bawk a, a hna vawn lai Indian Navy a bansan zui ta a ni.
- Vana LPS
Post a Comment
He post chungchanga i ngaihdan lo sawi ve rawh: