Aizawl | March 17, 2021: Myanmar buaina kal meka nunna chante sunna hun Vanapa Hall kawt Aizawl-ah nizan khan Mizo Zirlai Pawl (MZP) leh NGO united of democratic myanmar huaihawtin hman a ni.
He hunah hian thu sawiin MZP general headquarters president B Vanlaltana chuan, "tun hun hi a ni lo em ni unau kan nihna tihlan hun tur?" tiin sawrkar leh mipui chu Myanmar a zohnahthlakte tana ke pen turin a sawm a ni.
MZP president chuan, 1966 Mizoram buai-ah mi tam tak Myanmar-ah an chhoh thu leh anni in tha taka an lo dawnsawn lai a, tunah buaina an tawk ve a, min mamawh lai hian kan ngawi mai bik tur a nih loh thu sawiin, Myanmar zohnahthlakte tan hian MZP chu engtik lai pawhin a din reng tur thu a sawi bawk.
MZP hian Burma Zohnahthlakte tan hian tanpuina tam tak a lo pek tawh bakah inrinni hian an tan mobile concert buatsaihin vehbur a khawn dawn bawk a ni.
He huna tel ve Myanmar lama Zohnathlak pakhat a hming tarlan duh loh chuan, "Zofa hnam hrang hrangte hian kan buai leh mangan tawpah chuan MZP hi kan bel leh thin. MZP hi Zofate tan chuan innghahna tlak a ni fo thin." tiin a sawi a ni.
Post a Comment
He post chungchanga i ngaihdan lo sawi ve rawh: