Health Minister-in Mizoram atanga Anemia natna umbona tur project hawng

Aizawl | March 31, 2021: Thisen tlakchhamna (Anemia) laka Mizoram mipuite kan fihlimna tura beihpui thlak ruahmanna "Anemia Mukt Bharat Strategy for Mizoram State" chu Health & Family Welfare Minister Dr. R. Lalthangliana'n nimin khan Taxation Deparment Auditorium, MINECO-ah a hawng.

Hawnna inkhawmah thu sawiin Health Minister Dr. R. Lalthangliana chuan mihringin damrei kan duh a nih chuan kan taksa a hrisel that a ngai a, natna hrang hrang enkawlna tur damdawi chi hrang hrang a awm rualin, hengte mamawh lo tur hian mitin hian senso hautak si lova kan tih ve theih a awm a ni, a ti a. Mahni taksa vawng uluka, a tui kan tih zawng ringawt um lova ei leh in hrisel leh tha kan thlan thiam a pawimawh a, daktawr leh nurse ten min enkawl thin lai mek hian mipuite pawhin kan hriselna atana kan tih ve ngai thil tha leh tangkai kan tih hi a Pathuan thu em em bawk a ni, a ti a. Mizote zingah thisen tlachham Hb hniam kan tih mai hi kan tam em em a, thisen pek nikhua ah pawh pek tum Hb hniam vanga pe thei lo kan tam thin a, a bik takin hmeichhiate zingah an tam lehzual niin a lang a, hei hi a chhan engpawh ni sela, kan ei leh in bakah kan nunphung a hrisel zawnga kan her rem lehzual a tul tho niin a lang a ti a, hetih kawngah hian mipuite pawh uar lehzuala zirtirna kan pek a ngai a ni, a ti.

Anemia Mukt Bharat Strategy for Mizoram State kengkawhtu tur National Health Mission, Mizoram Mission Director Dr. Eric Zomawia pawhin thu sawiin Anemia Mukt Bharat hi sawrkar laipui chuan kum 2018 september thla khan an lo kalpui ta tawh a, Mizoramah erawh hemi atana damdawi sem tur Iron-Folic Acid chu Mizoramin kan mamawh ang zat kan hmuh lawk theih loh avang leh COVID-19 hripui a rawn len zui tak avangin kan kalpui tlai deuh hret a ni, a ti a. Hb hniam hi thil ho mai mai anga ngaih chi a nih loh avangin, hneh tura theihtawp chhuaha tan lak a tul dawn tih a sawi.

Anemia Mukt Bharat hi NITI Aayog in POSHAN Abhiyaan leh National Nutrition Strategy an duan zulzuia kalpui a ni a. He programme in a tum ber chu kum 2022 ral hma a naupang zinga Anemia vei a lo berah kumtin 3% a tih tlemte, tleirawl (kum 15 - 19), hmeichhia naupai hun (kum 15–49), raipuar leh nu nau hnute pe mek zinga anemia vei kumtin 3% a tihhniam a ni.

Nimin a "Anemia Mukt Bharat Strategy for Mizoram State" hawnna inkhawm hi Pu R. Lalramnghaka, Special Secretary, H&FW department-in a kaihruai a, Dr. TC Hmingthangi, SNO (RBSK/RKSK), national Health M ission hnen atangin Anemia Mukt Bharat kalpui dan tur ruahmanna ngaihthlak a ni a. School Education Director Pu James Lalrinchhana leh Women & Child Development Director Pi Lalpianpuii ten thu an sawi bawk a ni.

- DIPR