Ramri-a insumdawn tawnna thil-ah Commerce & Industries minister Dr Thangtea leh Bangladesh Commerce Minister inkawm

Aizawl | March 22, 2021 : Mizoram leh Bangladesh insumdawntawnna “border trade” chungchanga Dhaka, Bangladesh-a zin Dr. R. Lalthangliana, Commerce & Industries Minister chuan nimin khan Bangladesh Commerce Minister Tipu Munshi hmuin inkawmna hun tha tak an nei a, Bangladesh Commerce Ministry-a official te pawh he inkawmnaah hian an tel kim hle a ni.

He inkawmnaah hian Mizoram lam atangin ramria insumdawntawnna atana hmalak tawhna te, hmalak mek te leh hma chhawp te tarlan a ni a. Bangladesh Commerce leh Officials pawimawh bik tak takte hnenah hian Mizoram Chief Minister Pu Zoramthanga’n a ngaih pawimawh em em mau (Bamboo) lian chi Dr. Thangtea hian hlanin, an duh chuan Chittagong Hill Tract-a ram zau tak an neih mekah pawh an chin ve theihna tura Mizoram Chief Minister-in ruahmanna a siamsak theih thu te, nakin zela Bangladesh nena kan insumdawn tawn theih hunah pawh thil tha tak leh mi tam tak eizawnna siam chhuak thei tur chu Mau a nih ngei a beiseiawm thu Dr. Thangtea hian a hriattir a. Bangladesh Minister pawh hian hei hi a lo ngaihpawimawh sak hle a ni. Hei bakah hian insumdawntawnna tur atana chhenfakawm tur Mizoram lam atanga kan thawn thlak theih hmarcha, spices dangte leh sawhthing, teak, aieng, serthlum leh lung (stone) tha chi kan neih bik leh ram chhunga kan thlai thar chhuah chi hrang hrang te, kan thiam thil siam chhuah chi hrang hrang ram pawna thawn tlak tak tak kan neihte pawh Bangladesh nena insumdawn tawnna atan kan neih theih beisei a nih thu Dr Thangtea, Commerce and Industries Minister hian a sawi chhuak bawk.
Minister Dr Thangtea hian Kawrpuichhuah, Tlabunga Border Trade dinna tur atan hian Trade Facilitation Centre pawh Sorkarna an chelh hmasak hun lai daih tawha peih fel leh hawn a nih tawh thu sawiin, Kawrpuichhuah panna kawng   pawh Double lane-a Blacktopping zawh vek a nih tawh thu leh India sawrkar Officials te nen pawh a hmunah enfel niin, tunah hian survey leh thil dang tul zawng zawng pawh ngawrh taka buaipui a ni  a ti a. Bangladesh sawrkar thuneitu sang te pawhin rang leh hmanhmawh taka an tihtur awm ang ang tur an tih ve thuai thuai a tul tawh thu a sawi bawk a,  Bangladesh Commerce Minister Pu Tipu Munshi nena Kawrpuichhuaha Integrated Check Post (ICP) dinna tur hmun en “Joint Spot Verification  visit” neih Dr Thangtea hian rawt nghalin May thla chawhnu lamah hei hi tih theih a nih tur thu Bangladesh Minister hian Dr Thangtea hi a hrilh nghal a ni.
Hei bakah hian Bangladesh nena kan ramri dep ve ve ah awlsam zawka kan insumdawntawn theih nan Silsuri Tuipuibari Nunsuri leh Marpara Border Haat te chu a nihna ang tur taka chhawr tangkai tura Bangladesh sawrkar lamin an tih ve ngai te tih thuai thuai a tul tawh thu pawh Dr Thangtea hian a thlen a. Silsuri hmuna border haat neihna tur phei chu Bangladesh Sorkarin ramri thleng deuh thaw kawng an rawn sial chhuah tawh thu leh Mizoram Sorkar pawhin Truck kal theihna tura Silsuri thlenga kawng a lo ruahman tawh thute a sawi chhuak a ni. Silsuri Boder Haat hmun phei hi chu April thla chawhma lamah Bangladesh Minister Pu Tipu Munshi-a nen Joint Visit neia tlawh theih ngei an tum thu an sawi dun nghal.
Minister chuan MNF leh India sawrkar inremna (Memorandum of Settlement, 1986) ah khan kan state chu a thenawm ramte nen ramriah an insumdawntawn thei ang tih chiang taka a inziah thu sawiin, hemi tihlawhtling tura hma an lak zel tur thu a sawi a ni. Inkawmna hun an neih zawh hian Minister pahnihte hian Press mite hmachhawnin border trade chungchanga zawhna te an chhang a. 
Nimin vek khan Federation of Bangladesh Chambers of Commerce and Industry (FBCCI) President Sheikh Fazle Fahim leh hruaitu dangte nen FBCCI office-ah an inkawm a, FBCCI hi Bangladesh-a sumdawng pawl lianho inzawmkhawm niin anni hmalakna hi a pawimawh em em a ni.
Hemi hnu hian Commerce Minister Tipu Munshi’an zanriah a buatsaihsak leh a, he hunah hian Bangladesh sawrkar-a Commerce, Shipping, Landport, Home, External Affairs Ministry atang ten Secretary rual leh Indian High Commission atangin Commerce changtu Officer te an tel a, official pawimawh engemaw zat an tel bawk. Minister zin hi Commerce & Industries Department-a official ten an tawiawm a ni.

Post a Comment

0 Comments