AMC Councillors te lakluh an ni; Mayor leh Deputy Mayor thlang

Aizawl | March 2, 2021: Nimin khan AMC Office, Board Of Councillors Hall-ah Aizawl Municipal Corporation (AMC) Councillors 19 thlan tlin  te chu rinawmna thutiam tira lak luh an ni a, Mayor leh Deputy Mayor thlanna neih niin anni pawhin he Office atana thutiam an la bawk a, Executive Councillors 4 ruat te pawhin he office atana thutiam an la bawk a ni.


AMC Councillors te lakluhna inkhawm ah hian Municipal Commissioner Pu K. Laldingliana chuan Councillor thlan tlin hming leh an Ward te a chhiar a. Hemi hnu hian Aizawl District Magistrate Pu R. Lalramnghaka, IAS kaihhruaina hnuaiah Councillors atana thlan tlin te chuan rinawmna thutiam an la.

AMC enkawlna dan in a phut angin AMC Mayor leh Deputy Mayor thlanna neih nghal a ni a,  AMC Mayor atana Ward I Councillor Pu Lalrinenga Sailo thlan niin Deputy Mayor atana Ward XII Councillor Pu R. Thanglura chu thlan a ni a, anni hian he office atana thutiam chu an la nghal a. Mayor hian Executive Councillor atana Councillor 4 a ruat a, chungte chu – Ward II Councillor Pu Lalringliana; Ward IV Councillor Pu Laltlanzova Khiangte; Ward IX Councillor Pi B. Lalawmpuii leh Ward XI Councillor Pu H. Zonunsanga a ni a, anni pawhin thutiam an la bawk a ni.

AMC Councillor lakluhna inkhawm ah hian Deputy Chief Minister Pu Tawnluia; Health Minister Dr. R. Lalthangliana; I &PR Minister Pu Lalruatkima; Sports Minister Pu Robert Romawia Royte bakah Pu C. Lalmuanpuia leh Prof F. Lalnunmawia, MLA te an tel bawk a ni. UD &PA Secretary Pu K. Lalthawmmawia leh Sawrkar official dangte pawh an tel bawk  a ni.

Post a Comment

0 Comments