Lawm avanga bianga mittui luantir thintu - Zo Inspiration

byH Zate — 1
Mi lungngaite thian leh tanpui ngaite tanpuitu tia hriat hial Zo Inspiration hi i lo hre tawh ngei ang.
Mizoram-a thalai tha ber ber thlankhawm an ni lova, mi fing leh remhre ber ber thlankhawm lah an ni hek lo, mahse, mi lungngaite tan thian an tling a, thlamuantu an ni a, an ni kaltlangin Mipuiin tanpui ngaite an tanpui a, tanpui ngaite'n an mamawh tanpuina an dawng bawk thin a ni.

Ni e, heng an thil tih thinte avang hian he thalai intelkhawm hi 'Lawm avanga mi bianga mittui luantir thintu' an ni reng a ni.


Zo Inspiration hi covid 19 avanga rawn irh chhuak a tih theih awm e. COViD-19 hripui avanga kum 2020 March thla atanga lockdown kan nih hnu khan a bul tantu Emmanuel Rosanga rilru-ah youtube channel siam a lang tan a. Tichuan, April ni 17 zan khan ama youtube channel awmsa chu a hming thlakin 'Zo Inspiration' tiin bul alo tan ta a ni.


Zo Inspiration hi a tir chuan midang tanpuina(samaritans) lama kal a, mi dang tana zah pawh dawn lova mi tam tak sawiselna kara vehbur khawntu nih hi an tum a ni bik lo, Mizoram chhung bika thil thleng thar leh thalaite mitti tlai thei tur zawng tihchhuah duhna rilru pu a siam a ni ber a, a pawl ang pawn an la ding chiah lo a ni. Mahse, Samtlang tlangval Hruaizela chhiat tawh chungchang video an tih chhuah khan mi pakhat hnen atangin vehbur khawnsak tura ngenna an dawng a. Tichuan, rinna nen a vawikhat nan an khawnsak ta tawp mai a ni. Chu chuan an rin leh beisei aiin mipui rilru-ah hna a thawk a, hetah hian cheng nuai 10 chuang an khawn tling nghe nghe a nih kha.


Zo Inspiration  an kalpui chungchangah Emmanuel Rosanga chuan, "Ka hriat chian em em mai pakhat chu khawvel chhe tawh viau mahse midang tana luan chhuah duh mi dang hmangaihna nei tak tak inphum ru tam tak an la awm tih hi a ni." a ti a.
"An neih leh hauhsak bik  vang pawh ni lovin an neih chhun ang tete an lo thawh khawm a.  Zirlai then phei chuan an scholarship atang te, a then in an hlawh atang ten pawisa an lo donate thin a. A changin mittui nen donation rawn petu te nen lawm avangin kan in thlah liam chang te a awm." tiin, sawi chhunzawmin, "Hei hian Mizo te rilru ah inhmangaih tawnna te, pachhia leh khawsak harsa zawkte dawmkan kan la ngaih pawimawh zia te a tilang chiang em em a ni." a ti bawk.

Zo Inspiration din kum, member?
Sawi tawh angin, Kum 2020 April ni 17 zan dar 10:00pm vel khan Zo Inspiration hi din a ni a. Zo Inspiration ah hian a tul huna che chhuak thei tura mi in pe member 12 an awm mek a ni. An member tam zawk chu thalai tak tak te an ni hlawm a. Zo Inspiration hi membership ang zawng pawha kalpui ala ni chiah lova, an feh chhuahna a kal ve duh mi inpe an awm chuan lawm takin an dawng sawng thei reng a ni, tiin an hotupa Emmanuel Rosanga hnen atangin EXPLOREMIZORAM.COM chuan thu a dawng

Engti anga kal nge an tum?
Zo Inspiration hian a tum ber chu mi harsa zawkte tanpui a ni a. Mi harsa te tanpui a hun hman chhoh zel an tum a, amaerawhchu, pawl anga lirthei te an la neih loh avangin duh angin an vak kual nasa thei hrih lova, nakinah chuan tun aia zau leh nasa zawka hmalak tumin beiseina nen theih tawp an chhuah mek a ni.
Tin, luanchhuah bakah thil thleng thar leh mi beng ti-var thei tur video te tih chhuah zel an tum bawk.




Mi an ṭanpui tawh zat?
Vehbur hi chhungkaw pariat an lo khawnsak tawh a. Tin, mi inphalte sum pek khawm hmangin mi 15 lai an lo tanpui tawh bawk a ni. Nimin, February 28, 2021 thlenga Zo Inspiration a mi inphal ten sum an pek luh tlingkhawm zawng zawng chu cheng 31,10,313/- lai a ni tawh a ni.

Harsatna an tawk ve thin em?
Emmanuel Rosanga chuan, "A chang chuan phone call ten a thenin kan kal phung tha ti lovin min lo an khum vak mai thin a. Tin, mahni intih lar tumna a video siam a ngaiin social media ah sawiselna kan tawk nual tawh bawk." a ti a.
"A tha leh dik nia kan ngaih hi tha tilo tawk an awm reng mai a nih hi, hei hian famkim lohna khawvel a nih zia a tilang chiang hle awm e. Mahse, mi min sawi dan ni lovin mahni lam hi dik ila, Pathian chuan min ensan ngai lo tih hi a takin kan tawng chiang khawp mai. Hetia kan tih hram hramna avanga damna chang ta te, in leh lo tha tak nei ta te kan hmuh chang hian inchhirna kan la nei lo a ni." tiin EXPLOREMIZORAM.COM a hrilh bawk.

In chhuahna velnaah hian sum in mamawh awm si a, engtin nge in tih ṭhin? tih zawhna chu, "Vahchhuah nan chuan Youtube-a kan hlawh kan hmang tlang pui a. Mahse, a changin, 'in mamawna apiangah in lo hmang dawn a ni a,' tia pawisa lo thun an awm nawlh thin a, chung te kan hman chang a awm bawk," tiin Zo Inspiration hotupa Emmanuel Rosanga chuan EXPLOREMIZORAM.COM a chhang.


Youtube Channel: Zo Inspiration youtube channel hian he thu buatsaih lai hian subscriber 201K a nei tling tawh a ni.



Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Tags:

1 Comments

He post chungchanga i ngaihdan lo sawi ve rawh:

  1. J. RinteaJuly 6, 2021 at 12:52 AM

    Mizo youtube channel ah hei chiah hi ka en peih. Celeb tihvel engemaw ti leh tute emaw sap pasal nei tihvel te ka en peih velo. He channel hian min khawih thin hle

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post