Ramri Buaina: Hliam tuar thenkhat damdawiin panpui; Boruak a dai rih!

Aizawl | Feb 10, 2021: Mizoram leh Assam inrina Bairabi bul Zophaia Police out post piah lawk Leilet ah leilet enkawltu hnamdang leh Bairabi khaw mi thenkhat te inkarah inhmuhthiam lohna a thlen avangin nimin khan helai boruak hi tlemin a tang deuh a, tunah erawh boruak a dai tawh niin AIR Aizawl chuan tukin khan a tarlang.

Bairabi Village Council Member pakhat leh P&E deptt a thawk te chu nimin khan helai hmunah hian hnathawk turin an kal a, Zophai leilet leh a chheh velah Electric LT Line zawm belh  tum an ni a, hetihlai hian hnamdangmite chu lo inhawrkhawm in, engemaw thu ah an inhnial buai deuh a, kut an inthlak a, Hemi hnu hian Mizote leh helaia cheng hnamdangmi thekhatte chu lung in an intawng a, buaina lianzawk thleng lovin an tindarh leh vek tawh a ni.

Nimin tlaia Zophaia buaina chhuak leh avang hian Kolasib SP Pu Vanlalfaka Ralte, SDO(sadar) Pu Vanlalchhuanawma Chawngthu leh DLAO Pu ST Lalhmingmawia te chuan Bairabi an pan nghal a ni.

He intih buaina hmunah hian, Bairabi North VC Member Pu H. Vanlalrova leh P&E a hnathawk Pu H.Vanlalnela leh  Biaksanga Dousel ten kut an tuar a, High School Zirtirtu Pu Vanlaldika kum 49 mi leh a nupui fanau te pawhin kut tuarin Kolasib Hospital-a hruai an nih hnuah Durtlang Hospital panpui an ni a, hliam na lutuk an tuarlo niin thudawnna chuan a tarlang.

He buaina avang hian nizan khan MZP general headquarters hruaitute chuan an president B Vanlaltana hovin Bairabi hi an pan nghal a, hliam tuarte pawh an tlawh bawk a ni.

MZP chuan he buaina vang hian vawiin lama executive meeting an neih tur pawh an thulh niin an thuchhuah chuan a tarlang bawk.

Gharmura lam:

Gharmura a Mission School Headmaster hi Pu H.Vanlaldika niin he tia vai thenkhat tute nge an nih tak an hriat loh ten an rawn beih hun hi nizan dar 9:30 vel ni a a hriat thu Pu Dika hian a sawi a. 

Chowkidar quarter leh Headmaster te quarter hi Main Gate bul hnai a awm anih avangin an rawn target hmasa ani. Hetih hunlai tak hian chowkidar te hi inah an awm lo thung.

An thenawm khawveng a vai ho rawn tlan khawm thuai in, pawikhawih tute hi an tlanchhe nghal niin Pu Dika hian a sawi. Khawchhung mi vai hovin rawn pui in,in kang te pawh an thelh mit thei ani. Tunah hian Assam police ten an awm chilh tawh a.

Pu H.Vanlaldika te chhungkua hian kut an tuar hlawm a, amah hian kut an thlak thu sawiin a nupui Pi R.Lalmuanpuii pawhin a lu ah hliam a tuar niin a sawi.

An fanu pakhat hi a hnungah an sat a. An fate dang pahnih hian engtiang chiah a hliam tuar nge an nih leh an tawrh dan a chiang rih lo a. nizan dar 10:45 khan an chhungkua hian Kolasib lam panin Zophai an pel tawh a, tunah hian Kolasib an thleng tawh a. Kolasib ah hian Pastor ten an lo hmuak a, damdawi in an panpui nghal a ni.