Ramri-ah buaina chhuak; Hliam tuar awm bawk

Aizawl | February 9, 2021: Bairabi atanga  thu kan dawn danin Zophai Mizo leilet a Power & Electricity department line enfiah a kal leh an mahni tawiawmtu Bairabi VC member H Vanlalrova te chu Cachar lam mi hnamdang rualin an hnathawk lai chu vawiin tlai dar 4 vel khan kut an thlak.
Thudawnnain a tarlan danin, Pu H Vanlalrova hi a kawngah hliam a tuar a, a scooty chabi, a mobile phone leh samurai an lak sak a ni.

Buaina thlen thu hriat anih vel leh Bairabi atangin MZP President leh Vice Preident ten an kal nghal a. Hnamdang leileta thawkte hi an lo tam hle a, lungin an intawng a. Bairabi thalai inpunkhawmin Zophai lam hi an pan a, Mizoram Police pawh SDPO Pu Vanlalduata hovin a hmun an thleng ve nghal a. Boruak a la sosang hle niin Bairabi atanga tun maia kan thudawnna chuan a sawi.

Bairabi Zophai a leilet vai hovin P&ED leh VC thenkhat Zophai a  Power line enfiah tura kal te an lo vua a, Bairabi VC member pakhat Maroa chu a kawng an vaw na a. Bairbai thalaiin Zophai lam hi an pan ve niin Bairabi atangin thu kan dawng. 

Kolasib atangin Police hotute an chhuk thla nghal a, boruak duhawm lo erawh a thlen belh hriat a la ni rih lo.

Tunah hian thudawnnain a tarlan danin, Assam lam hi police nen an ni a, an pawng hle a ni.

He buaina chungchang video hi social media-ah a darh nasa hle a ni.


Video viral-ah a sawi danin, Assam lam hian Zophai leilet thleng kawng rawn sialin an rawn lai a ni.

GHARMURA UPDATE
10:30pm: Vai ho an in saseng tawh a, tunah tak chuan an awm tawh rih lo. Vai ho hi ṭhalai rual deuh an ni a, 30-40 rual vela rin a ni. Ramri buai vel vanga Mizo chunga inhrik thlak tum an nih an ring ber.




Mission Compound a Quarter hmasa ber, Pi Lalramchuani (Evangelist) te in leh an Motor(Santro) chu an hal chhiat sak nghal a, Pi Chuani te in dawt chiaha Headmaster Quarter luh chilh lehin an bungraw thenkhat an tih chhiatsak bakah Headmaster fanu hi an sat hman bawk. A fanu a chhanna lamah Headmaster hian a lu ah hliam a tuar bawk. Kolasib Hospital lam pan turin an in ruahman mek a ni.
Vai ho hi ṭin tawh mahse nunau ho chuan Compound chhunga an Quarter an la chhuahsan rih lo a, an la tawm ṭhap a, mipa ho in ruahmanna an siam mek a ni.
Hliam tuarte leh hlauhlawp thlaphang te, "Vanah an lal lukhum a va mawi dawn em!!"
- David Sailo >MSR

11:30PM: Ramria buaina vangin MZP general headquarters executive meeting naktuka neih tur chu ṭhulh a ni a, MZP general headquarters president B Vanlaltana, General secretary Lalnunmawia Pautu leh treasurer Andrew F Lalramnghaka bakah hruaitu eng emaw zatin a hmun an pna nghal.

MZP chuan a hnuaia mi ang hian thuchhuah an siam:
*MZP GENERAL HEADQUARTERS, EXECUTIVE MEETING CANCEL A NI*

Vawiin 9 February,2021 (Thawhlehni) chawhnu lama Bairabi Zophai hmuna Vai misual ten Mizo kut an thlak avang leh thisen hial an chhuah avangin MZP chu a thinur tak zet a.
Zophai hi kum 2018 a MZP ten *Zofate Chawlhbuk* a lo sak tawhna hmun leh zirlai tam takin kut kan tawrhna hmun a nih bakah, thisen tam tak chhuahna leh silai meuha Assam Police in zirlaite an kahna hmun kha a ni.
Hetiang anih avang hian MZP General hruaitute chu MZP Inter High School Quiz Final zawh ve leh *Pu B Vanlaltana, President* hoin hruaitu engemaw zatin Zophai hi an pan nghal a.
Ni 10 February, 2021(Nilaini) a MZP General Headquarters Executive meeting koh pawh tiam chin awm lova sawn hlat nghal a ni tih MZP chhungkua (Executive Committee Member, College SU leh Hnampual) te kan inhriattir a ni.
Mizoram hmun hrang hranga  MZP Headquarters, Sub-Hqrs, Branch, College S.U leh Hnampual hruaitute a ṭul anga che chhuak thei tura inring vek tura ngen leh hriattir kan ni nghal bawk e.

              Sd/- 
(LALNUNMAWIA PAUTU)
      General Secretary


11:40PM: Kolasib DC leh Hailakandi DC te inbiakna dung zuiin Assam police in Gharmurra a Mizo awm te hi an veng tawh tih report a ni a. Hliam tuar te pawh hlauhthawnawm lutuk an awm lo nia hriat a ni.

Tunah hian CYMA aiawh te Kolasib Sub.Hqr hruaitute nen an inkawm zova, Kolasib DC nen meeting an nei leh dawn e..

Post a Comment

0 Comments