MZU MA (History) Gold Medalist 2020 RL ROHLUPUII

byVidpuia Hrahsel — 0
Mizoram University (MZU) Master of Arts (History) Gold Medalist RL Rohlupuii kan belchiang. 


Rl-i hi MZU MA (History) ah CGPA 8.56 score in Gold Medalist a ni a, M.A. (History) IVth Semester a zir laiin NET a through tawh nghe nghe. 
R.L.Rohlupuii hi R.Rosiamliana leh H.Laldinthari te fanu niin, May ni 22, 1996 khan a lo piang a  Rl-i tiin emaw Mapuii tia koh ṭhin a ni. 
Unau pathum niin, an unau hi hmeichhia vek an ni a, an unau zinga naupang ber a ni. Rli te hi Salem Veng, Aizawl ah chengin an khawsa a, Presbyterian Kohhran a lawi an ni

Zirna lam:
1. Pawl 1 atanga pawl 10:
-Kg 1-Pawl 7 hi  Lalmalsawma Memorial School,Khatla ah ka kal chhuaka.Pawl 8-Pawl 12 hi St.Paul's Higher Secondary School ah ka kal chhuak leh a.Middle School ka kal lai hian Top 5-ah chuan ka lang ve ziaha. Pawl 7 Board Exam ah Aizawl district ah 5th rank hauhin Maths subject ah top scorer ka ni a. Pawl 10 hi kum 2013 ah  Distinction ah ka pass a, 7th rank hauhin subject zawng zawng ah Letter ka hmu a, Science subject ah top scorer ka ni bawk a ni.

2. Pawl 12:
- Pawl 12 hi kum 2015 ah St.Paul's Higher Secondary School atangin Science Stream-ah I Division ah ka pass a, Physics ah Letter ka hmu bawk a ni.

3. Zirna sang zawk:
-Under Graduate- ah hian kum 2015 atangin Pachhunga University College ah History core subject ah la in, 4th Semester thleng Political Science leh Public Administration Elective ah ka la a.Kum 2018 ah BA History ka pass chhuak a.MA hi Mizoram University ah kum 2018 atangin ka zira kum 2020 khan ka pass chhuak leh a ni.


# I lehkha zir dan?
-Lehkha hi a hranpain ka zir tam lemlo a. Class lecture ka ngaithlak atang te, zirlai bakah zirlai kaihhnawih lehkhabu ka chhiar te leh historical documentaries leh history movies ka en aṭanga  hriatna ka lo khawl khawm ve bek bek te hian nasa takin ka zirlaiah min pui a. Tin, ka subject lakin a lo zir bawk nen lehkha ka chhiar hian lehkha zir anga thiam tum ngawr ngawr loin ngaihnawm chhiara chhiar ka tum thin. 

# harsatna I hmachhawn dan?
-Harsatna ka tawh reng renga ka tih hmasak ber chu Pathian puihna leh awmpuina dila ṭawngṭai a ni a, harsa ka tih zual bik ṭum te chuan ka chhungte leh ṭhian ṭha te min ṭawngṭaipui turin ka sawm a. Chumi zawhah keiman ka tih theih chinah chin fel ka tum a, ka chin fel theih phâk bak anih chuan Pathian chinfel ah ka dah tawh mai ṭhin. 

# Gold medalist i nihna (Subject) leh CGPA?
-MA History& Ethnography, CGPA-8.56

Gold medalist ni tura i beih dan?
- Ka lehkha zir dan habit avang hian Gold Medalist nih tum ngawr ngawrin lehkha ka zir ngai lo a. MA ka zir chhunga ka tum ber chu kan Syllabus chhunga topic tin hriatthiam leh bel hle kha a ni a. Rank ṭha neih kha min khalh kaltu ni lo mahse class tests leh end semester exama ka theihtawpa ṭhaa ka inbuatsaihna khan a tawpah, Pathian khawngaihna avangin ka beisei loh result ṭha tak a rawn hring chhuak niin ka hria. 

Gold medalist ni tura i beihnaah faculty lamin an ṭawiawm/pui ṭha chein i hria em?
- Kan department faculty avanga Gold Medalist dinhmun chelh ve thei ka ni a. Kan zirtirtute hi kei mai nilo, an zirlai zawng zawng te tan an thawk rimin zirlaiten thiamna tak tak kan chhar theih nan an theihtawp an chhuah a. An class lecture kan hlawkpui ṭhin em em aṭang ringawt pawh hian an inbuatsaihna ṭhat zia leh zirtirtu mawhphurhna an hlen ṭhat zia a chiang hlein ka hria. 

I zirna atana i chhungte pawimawhna:
-Zirna kawnga ka nghahchhan lian ber leh min nawr kaltu chu ka chhungte hi an ni a. Zirna kaihhnawih anih phawt chuan an theihtawp bakah an phak bak thlengin ka mamawh min phuhruk sak ṭhin a. Ka zirna an ngaih pawimawh em em na te, min ṭawngṭai sakna leh ka zirna atana an inpekna tâwp lo avanga MA hial zir chhuak thei ka ni. 


I zirna atana i ṭhiante pawimawhna:
-Ka ṭhian te nen hian zirlaiah kan inpui tawn nasa hle a. Zirlai kan sawi hoin, heng study materials leh zirna kaihhnawih chhiar tur leh en tur ṭha te kan inhrilh hre ṭhin a. Ka laka an dawn ai chuan an hnen aṭanga ka dawn kha a tam zawk hle  bawk a ni. Tin, zirna bakah ka mimal nuna harsatna leh lawmna ka tawn changa ka  "support-system" nghet an ni a, anmahni aṭang hian ṭhian tha hlut zia a takin ka tawng chho mawlh mawlh reng a ni. 



A duhzawng leh ngainat zawngte:
Rawng -  Brown, Sandy Brown, Mustard Brown
Chawhmeh  -  Bawngsa, chana hring kan
Incheina - Shirts leh kekawr; inbel nuam leh loose lam zel
Rimawi – Indie Rock 
Mizo Ziaktu zingah - Darrokima
Hla-         Mizo ah - Kan damchhan-C. Vansanga
                 Sap ah - Trust in You-Lauren Daigle
Hla phuahtu - Lalruali
Teacher - Zirtirtu ka lo hrawn tawh te hian ka nunah sulhnu ṭha  tak tak, inang lo vek an hnutchhiah a, ze hrang hrang nei mahse, ka ngaina tlangin ka ngaihlu em em vek a ni. 
Leader - Nancy Pelosi. Huaisen, a tak taka hnathawktu leh a ṭha zawnga danglamna thlentu. 
Mize ngainat zawng - Mi rilru tluang leh inngaitlawm. 

Mize ngainat loh zawng - Mi chapo

Hobby- Novels chhiar, True Crime stories leh documentaries en leh chhiar. 

Relationship status - Single

Kawppui atan duhzawng -  Mi rilru tluang leh rilru nghet, ka kawmngeih theih tur leh min kawmngeih thei tu tur. 



Zawhna dang:::
1. A tel lova i awm theih loh: 
- Pathian, ka chhung te leh ṭhian ṭha te. 

2. I nun kaihruaitu:
-  Pathiana ka rinna leh '' Kan tuh rah ṭheuh kan la seng leh ang'' tih rin tlatna hian. 

3. Hringnuna i hlauh ber: 
- Mi beidawng, Pathian nei lova nun hman. 

4. I tih ngai miah loh tur:  
-Kei aia dihnhmun chhe zawka ding te hmuhsit, mahni kawppuite rinawm loh san. 

5. Mizo Tualzal nuna ṭha i tih: 
-Tlawmngaihna leh inlâwm tawnna;a bikin Chhiatni leh Ṭhatni thuah kan inpuibâwm tlang ṭhin hian Chhiatni ah tawrhna a chhawk a, Ṭhatni ah min chawi ropui zual ṭhin. 

6.  Quote i duh ber: 
"Tichuan, Pathian thlamuanna, rilru rêng rênga hriat sên loh khân,in thinlung leh in ngaihtuahnate chu Krista Isuaah chuan a vênsak ang che u." - Philippi 4:7
'' Courage is fear that has said its prayers''-Dorothy Bernard
                                      
7. Mizoram leh Mizo tualzal nuna Mizo hmeichhiate dinhmun:
-Tuna Mizorama hmeichhiate dinhmun hi kan hnung deuh nena tehkhin chuan a ṭha viauin ka hria a. Zirna lamah pawh hma kan sawnin, kan hnung deuha hmeichhe thawh tura kan lo dah ṭhin loh hna tam tak thawk pawh an tam ta hle a. Tin, khawvel hmun dang leh India ram state dang nena khaikhin pawhin a nawlpuiin kan him viauin ka hre bawk. 


8. Hnam hmingṭhat leh hmingchhiat kawngah Hmeichhiate'n mawhphurhna:
-A hmei a pain kan mawhphurhna a inang a. Khawi hmunah pawh awm ila, zahawmna leh rinawmna hi kan chetzia, kan ṭawngkam leh kan hnathawhnaah chawi nung tlat ila a ṭha ka ti. 

9. Hnam ziarang chawinun kawnga Hmeichhiate mawhphurna:
-Mahni hnama chian leh kan chawr chhuah na- kan 'history' ngaihven leh ngaihsan te, kan hnam nihphung leh tihdanphung chawi nun tlat te hi a pawimawh khawpin ka hria. 

10. Mizote tan 'Fa neih tlem' inzirtir hi a ṭulin i hria em? 
-Tuna kan ram dinhmun thlir hi chuan a ṭul berin ka hre lo. Chutih rual chuan mahni khawsak dinhmun thlir chunga, an mamawh kan phuhruk sak theih chin fa nei tura inzirtirna te hi chu uar a ṭulin ka hria. 

11. Mizo hnam ṭhanmawh bawk nia i hriat?
-Sawi tur a awm nual a, mahse ka hmuh len ber hi chu a lêra hruaitute leh hnathawktu te zingah ram tan leh mipuite tana hnathawk an ni tih hrechang loa mahni tana hmasial zawk tlat an tam niin ka hria. 

12. Mizo hnam damna atana  kawng awm nia i hriatte?
-Mahni hnathawh leh kan awmna hmun ṭheuh ah rinawmin, kawng engkimah Kristian kan nihna hi kan chetzia leh hnathawh ah lan chhuah tir tum tlat ila a ṭha khawpin  ka hria. 
13. Hnam chhan nana Hmeichhiate ṭangkaina leh mawhphurna?
-Hnam chhan nan hian tupawh hian mawhphurhna kan nei vek a,chhan dan kawng pawh a tam. Hmeichhia kan nihna anga kan tih theih pakhat chu kan hnathawh, kan nun leh keimahni kan inpho chhuah danah zahawmna, thianghlimna leh rinawmna dah pawimawh ber fo ila ka ti.

14. Zirna, Khawtlang leh Kohhran hi?
-A hmasa berah chuan mahni theih chin leh phak chin hriatchian hmasak a pawimawh ka ti a. Mahni tan mai bakah Khawtlang tan leh Kohhran tana lehkha zir tur kan nih laiin, zirlai kan nih chhung hi chuan kan zirna tibuai lo tawka inhman dan tawk thiam a ṭulin ka hria a. Tin, mihring kan inang loa, inhmang tak chunga ṭha taka zir thei an awm laiin inhmang kawp thiamlo awm theih bawk a ni a. Hei hi chu a mihringah a innghat ber ka ti. 

15. Khawtlang, Kohhran leh nangmah:
-Khawtlangah hi chuan ka inhmang lo a, Kohhran leh KṬP ah hi chuan ka phak ang tawk chuan ka inhmang nasa ve a. Exam lai leh lehkha zir ngawrh lai erawh chuan ka rawngbawlpui ten min kêp hneh hle thung. 


16. Social Media leh Nangmah:
-Thil pawimawh sawi nana Whatsapp ka hman zeuh leh han hmelhriat ve nan hrim hrima accounts ka siam tih loh chu ka khawih meuh lo. 

17. Mizoram ṭhalai tam tak tlakchham:
-Mahni inrin tawkna, mahni nihna leh mahni tuma ngheh cherh chawrhna hi kan la tlachham tlâng deuhin ka hria. Zirlai ani emaw hnathawh ani emaw, tih tak takna nun hi kan la tlachham deuha, luhchilh leh tuichilh ai chuan a phaw vuaka duhtawk mai kan la tam bawkin ka hria. 

18. Mizo ṭhalaite hian ngaihsan tur dik an ngaisangin i hria em?
-Mizo ṭhalai tam tak hian ngaihsan tur dik kan ngaisang chho ṭan chuan ka hriaa. Zirna leh hnathawh engah pawh taimakna leh tumruhna avanga hlawhtlinna changte hi kan ngaisang chho ṭan viau a. Chutih rual chuan ṭhalai tam tak hi chuan kan ram hnuk rawn khawih pha ve lem lo, entertainment huangchhunga mi lâr te che vel leh Social Media-a hriat hlawh nih te hi kan la ngaisang deuh chuan ka hria. 

19. Ngaihsan tur dik nia i hriat:
-Mahni kalna kawng engpawh nise, chhawr tlak leh râwn tlak ni tur khawpa mahni hna leh zirlai tuichilha, tih tak taka bei tute hi ka ngaisang. 

20. Hlawhtlinna tura pawimawh:
-Taimakna, Tumruhna, Huaisenna leh Tei rei peihna te hi hlawhtlin nana inkawp tlatah ka ngai. 

21. hloh i hlauh ber:
- Pathian nena kan inlaichinna.

22. Hnam dang nupui pasal neih hi-
-Ngaihdan siam a har khawpin ka hria. Mahni hnampui ngei mai nupui pasala neih hi duhthusam a ni a, chutih rual chuan Inneihna hi chu a innei tura te inkar bik a ni a, hmangaihna dik tak vanga innei an nih miau si chuan midangin ngaihdan lo va neih sak chiam hi a fuh berin ka hre lo.

I thalaipuite tan fuihna--- 
-Kan thil tih reng rengah tih tak takna nun nei ila, kan kalna kawng ṭheuh ah chhawr tlak leh râwn tlak ni thei khawpa thiam tumin bei ila, a ṭha zawnga danglamna thlentu nih ve hrim hrim i tum tlang ang u.

EXPLOREMIZORAM.COM i hmuh dan:
-EXPLOREMIZORAM. COM hi ṭhalaite mai bakah Mizo mipuite tan hian site ṭangkai tak a ni a. Tunlai thil thleng thar bakah ṭhalai te hmasawnna pho chhuahna atana platform ṭha leh bengvarthlak tak a ni a. A bul ṭantu leh hneh taka enkawltu te hi fakawm ka ti hle bawk. In kal lehzelna turah duhsakna sang ber ka hlan a che u.


- Vidpuia Hrahsel
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post