MZU convocation hnih a rualin hmang; zirlai hlawhtling mi 9740 hnenah degree pe thar

Aizawl | Feb 27, 2021: Mizoram University Convocation vawi 14 leh 15-na chu vawiin February 27, 2021 khan Amphitheatre, University Campus ah hman a ni. Larsap Shri P.S. Shreedharan Pillai, University Chief Rector ni bawk chu khuallian niin he hun hi a hmanpui. 

Convocation vawi 14 na chu hripui len vangin nikum a hman theih loh a nih hnu in kumin-ah Convocation vawi 14 leh 15 na hi a ruaa hman a ni.  Kum dang ang lo in he hunah hian Gold Medalists, Ph.D Awardees leh Book prize winner te chauh tel in, sawrkar thuchhuak zawmin mi a tlem thei ang ber kalkhawm tur a ruahman a ni a, online a en theih turin live a pekchhuah a ni bawk. 

Mizoram Governor P.S. Shreedharan Pillai chuan Covid-19 vanga hun harsa kan tawh laia Mizoram University in Convocation hun a buatsaih thei hi lawmawm a ti hle. Mizoram University in hun reilote chhunga North East mai nilo, India ram chhunga University thang chak ber pawl a ni thei chu University a thawktu te leh zirlaite thawhrah liau liau a nih thu sawi bawk in; “Mizoram in a nih tur ang tak thleng thei tur chuan economic development, industrialization, revenue generation, employment creation ah te nasa zawka tan kan lak a ngai” tiin a sawi bawk. Thalai lehkhathiam rual vawiina kalkhawmte hian heng hmasawnna thlen tir thei tur chuan hma an hruai a ngai a ni a ti. 

Mizoram University hi kum 2000 kuma din niin, National National Assessment and Accreditation Council (NAAC) chuan  2019 leh 2024 inkar atan  Grade  'A' a pe a. National Institution Ranking Framework (NIRF) in ramchhunga university tha a thlanchhuah zingah kum 2020 atan Mizoram University chu 67- a dah mek a ni. 

Convocation vawi 14 leh 15 na ah hian Mizoram University Vice Chancellor Prof. K.R.S. Sambasiva Rao chuan zirlai hlawhtling mi 9740 hnenah Degree a pe thar a. Heng zinga mi 167 te chu a hmuna Degree dawng turin an rawn tel thei a. Degree dawng tura Convocationa rawn tel thei mi 167 zingah hian Doctor of Philosophy dawngtu mi 98, Gold Medalist 63 leh Book Prize Winner mi 6 an awm.

Mizoram Governor P.S. Shreedharan Pillai, Mizoram University Vice Chancellor Prof. K.R.S. Sambasiva Rao leh MZU Registrar, Prof. Lalnundanga ten Degree leh award te hi an sem a. MZU Registrar Prof. Lalnundanga chuan lawmthu sawina hun a hman hnuiin Vice Chancellor phalna lain MZU Convocation vawi 14 leh 15-na chu a khar a ni.

MZU hnuaia 2020 Gold Medalist-te kawmna HETAH hian dah a ni.

Governor speech HETAH hian dah a ni.