MZP in Burma-a zofate thlavang hauh nan sit-in demonstration buatsaih

Aizawl | February 4, 2021: MZP chuan tun hnaia Burma Sipai te chet dan leh thuneihna duh vanga, mihring dikna chanvo rapbet a, an chetna duh loh lantir nan leh Burma Sipaite chetna tuartu Zohnahthlakte thlavang hauh nan nimin khan Vanapa Hall kawtah Sit-in demonstration a huaihawt a. Pu Chinkhanmanga Thomte, Finance Secretary chuan he hun hi a kaihruai a ni.



He huna thusawitu Pu Peter Chhangte, Vice President chuan, "Vawiin kan kalkhawm chhan hi Political Party thil a nilo a, in unauna thinlung pu a he hun hi hmang kan ni a. Kan unaute harsatna hi kan harsatna a ni a, an hlimna chu kan hlimna a ni" a ti a.


MZP Vice President chuan, "He hun kan hman chhan hi Myanmar kan unaute kan lainata kan khawngaihzia lantirnan a buatsaih kan ni a. Kan sawrkar thuneitute pawhin tun aia nasa zawka kan unaute tan ngaihtuahna senga hmala ve turin kan sawm a. Kan unaute tan englai pawhin MZP chu kan awm reng dawn a ni" a ti bawk.


He hunah hian NGO Coordination Chairman Pu Vanlalruata leh Party hrang hrang aiawh ten thu an sawi bawk. 

Post a Comment

0 Comments