CYMA Vigilance Committee ten Aizawl a Petrol Black a zuarte kal kanin Vairengte a hmeithai zawrh manin case siam sak zui

Vairengte | February 15, 2021: Dt.10.2.2021 (Nilaini) a Central YMA Vigilance Committee ten Tuialthei pawlhdal ni a an puh leh an man sak, Pi Elizabelth-i, Godown veng, Vairengte chu vawiin hian Court ah inlan turin hruai a ni dawn a. CYMA te hian case siam lova man sak chauh an tum thu an sawi laiin case an siam leh ni a thu dawn a ni a,Aizawl leh a chhehvelah man tur tam tak a awm laia Vairengte a hmeithai zawrh an lo man daih chuan sawi zui a hlawh hle a ni.

     Thu dawn danin Dt.10.2.2021 tlai lam khan Central YMA hnuaia Vigilance Com- mittee te chuan Pi Elizabeth-i (38) D/o Lalzuithanga Godown veng, Vairengte zawrh lai Petrol leh Diesel an dahna chu an check thut a. Hemi hnu hian Vairengte Police te sawmin Pi Elizabeth-i te zawrh lai Diesel 520 ltrs leh petrol 34 ltrs chu an man sak  zui ta a ni. He tuialthei an man chungchangah hian Pi Elizabeth-i chuan CYMA hruaitute hnenah hian an vawikhat tihna chauh anih thu leh hmeithai niin fa 2, kumtlinglo a enkawl thute sawiin hei vang hian ngaidam mai turin a ngen a. He hunah hian CYMA hruaitute chuan report an dawn bawhzui a man an nih thu leh case pawh siam lova Tuialthei hi man chiah an tum thu an hrilh ni a thu dawn a ni. 
   Hetihlai hian CYMA Vigilance committee hian Dt.12.2.2021 (Zirtawpni) zan khan Vairengte Police Station ah Case hi ziaklut turin an ti leh si ni a thu dawn a ni a. Hetihrual hian case hi Zirtawp zan a ziahluh nimah se a hnuah cancel leh a ni a, amaherawhchu case hi nimin tlai vek khan ziahluh that leh a nih thu dawn a ni. Hetianga a nih avang hian vawiin lamah Pi Elizabeth-i hi Kolasib court ah a inlan dawn a ni. Hetihlai hian Aizawl leh achhehvel ah lang sar tak a Tuialthei Dan phal lova zuar (black) man tur tam tak a awm lai a, Vairengte Godown venga hmeithai zawrh kher an rawn man hian sawi zui a hlawh hle a.Heng tuialthei a black a zuar hi a veng YMA leh Sorkar thuneitute pawhin an hria in harsa zawk ten ei hmuhna atana tlem a zawng an zawrh an man sak duh mai leh case hial an siam sak duh chu CYMA Vigilance Committee te thil tih dan hian dem a hlawh hle a ni.
    Thu dawn danin tun tuma CYMA Vigilance Committee ten Oil an man sak Pi Elizabelth-i hian fa,kum la tling lo 2 neiin hmeithai a ni a. Eizawnna mumal tak a neih loh avangin a U te puihna in Petrol leh Diesel hi a black in a zuar ve a, Hetiang hmanga eizawnna an kalpui ve lai a man mai duh tawk lova case an siam sak hial hian CYMA te thil tih dan hi duh lotu an awm nual ni a thu dawn a ni a. kum hmasa lam pawh khan Elizabeth-i Unaunu leh a mah puitu Pi Immanuel-i Petrol leh Diesel zawrh hi tum eng emawzat an lo man sak tawh ni a thu dawn a ni bawk.

- Engkima Colney.

Post a Comment

0 Comments