Aizawl | January 22, 2021: North Eastern Electric Corporation Ltd(NEEPCO) chuan vawiin khan Sinlung Hills Council (SHC) hnenah Sinlung area mipuite hman turin Ambulance an hlan.
Hlanna inkhawm-ah thusawiin NEEPCO tuirial hydro electric plant General manager NJ Goswami chuan, NEEPCO in Mizoram leh northeast tana pawimawh leh ṭangkai tak mai power plant a siam thu sawiin, hemi bakah hian Mizoram mipuite tan CSR kaltlangin thil ṭha tam tak anntihsak thu a sawi a. Sikul, hall leh vantlang zunin te an saksak tawh thu tarlangin, Ambulance an pek pawh hi Sinlung Hills mipuite tana ṭangkai leh an harsatna chhawk zangkhaitu a nih ngei a beisei thu a sawi.
SHC Chief Executive Member (CEM) Lalthlamuana Hmar chuan, Sinlung Hills mipuite harsatna hriathiampuia NEEPCO in Ambulance an pek chu lawmawm a tih thu sawiin, mipuite mamawh leh harsatna a chhawk zangkhai ngei dawn tih sawiin lawmthu a sawi bawk.
SHC CEM chuan, NEEPCO chu mipuite tana ṭangkai leh malsawmna ni zel turin duhsakna a hlan bawk.
Hlanna inkhawm hi Sinlung Hills Council secretary VL Remliana, MCS chuan kaihruaiin, SHC executive member-te, Council member bakah NEEPCO hotute an tel a ni.
NEEPCO in ambulance an hlan hi Eeco van niin, an CSR (Corporate social responsibility) kaltlanga an hlan a ni.
Post a Comment
He post chungchanga i ngaihdan lo sawi ve rawh: